D.T.I. ta haci control necesario y ta conscientisa riba siguridad laboral

Director Interino di D.T.I., Richella Dorothal

ORANJESTAD (AAN):  Richella Dorothal, Director Interino di Departamento di Inspeccion Tecnico (D.T.I.) den un entrevista recien a elabora riba e siguridad laboral y e responsabilidad di doñonan di trabou pa nan trahadornan. Señora Dorothal a expresa di ta di lamenta cu recien hasta tabata tin un accidente fatal cu a pasa na pia di trabou. Den e casonan aki, D.T.I. tambe ta forma parti di e investigacionnan y ta atende cu e parti di ley unda cu ta exigi cu e doño di trabou tin e responsabilidad pa percura pa e siguridad di cada trahador.

   Señora Dorothal a remarca cu e ekipo di D.T.I. ta haci e controlnan necesario regularmente y ta indica na hefenan di trabou riba e aspectonan riba cua nan mester traha riba nan y drecha esakinan. Den casonan di situacionnan hopi insigur, D.T.I. ta para e trabounan.

   Segun señora Dorothal a agrega cu D.T.I. lo bolbe cuminsa cu campañanan di conscientisacion pa dunadornan di trabou. Prome cu Pandemia di Covid-19, D.T.I. ya tabata haci esaki na unda tabata duna instruccion y informacionnan na e pueblo trahador.

   Riba e tema ora cu accidentenan laboral tuma luga na pia di trabou, señora Dorothal a remarca cu doñonan mester tuma contacto cu D.T.I. mesora pa asina nan haci investigacion y traha rapport riba e accidente y publica esaki debidamente. “Hopi biaha e rapport no ta wordo publica den mayoria bes y e ta wordo otorga den ‘speciale gevalnan’ solamente den un caso di corte of si ta wordo haci un peticion pa e doño di trabou”.

   E directora di D.T.I. a duna di conoce cu den e rapport final semper ta pone sugerencianan pa doñonan di trabou pa asina evita accidentenan na pia di trabou den futuro.

   Encuanto sancionnan, señora Dorothal a remarca cu actualmente esaki no ta regla ainda pero den casonan di accidentenan grave, D.T.I. ta yama doñonan di trabou aden, especialmente ora cu nan no a raporta e incidente. Na prome luna nan lo mester duna cuenta na D.T.I. riba e motibo pa cua nan no a acerca D.T.I. Nan lo mester duna splicacion riba loke a pasa pa asina D.T.I. verifica y por duna sugerencianan con pa evita accidentenan laboral den futuro. Pa loke ta trata sancionnan, e directora a menciona cu e parti aki ta den proceso.