ORANJESTAD (AAN): Minister di Husticia, mr. Arthur Dowers, den un entrevista cu Matutino DIARIO,
a aborda e tema di cachonan brabo y agresivo cu ta cana riba caya aki na Aruba.
E mandatario ta considera cu e situacion aki, di cacho, a bay for di man y e ta kere cu mester bin un acercamento ‘mas holistico’ na e momentonan aki. T’asina cu tin cierto procesonan andando pa yega na un facilidad na unda por atende cu cacho, pero si tin un facilidad y bo tin 20 cacho pa atende, mientras tin miles di cacho riba caya e no ta bay yuda.
Minister Dowers a menciona cu el a combersa cu polisnan y tin na Cuerpo Policial hende cu ta dedica nan mes e situacion aki, pero hecho ta cu ta un problema fo’i control.
“Nos mester atende cu ne den e aspecto legal, pero tambe den e aspecto di receptividad di hende. Si wak bon hopi hende ta bisa bo cu animalnan ta wordo mata. Nos tin un persona aworaki envolvi, analizando henter e proceso pa loke ta trata e parti di guia, Kico ta wordo afecta door di cachonan cu ta cana los of cachonan cu no ta wordo atendi cu nan”, Minister Dowers a señala.
E mandatario a sigui bisa cu tin cachonan cu ta causa hopi molester den bario, tin hende cu tin entre tres cu cinco cacho na nan lugar, cu ta blaf continuamente, stroba hendenan drumi, tin cu ta ataca facilidadnan of mascotanan di hende, cu hende ta ataca e ora ey core tras di otro cu machete, loke no ta un cos nobo pero algo preocupante si, y e ta un cos cu mester bay haya un acercamento basta amplio.
“Bo mes tin cu bay pensa como Gobierno con mi ta atende. Gobierno no por atende cu tur problema di biaha, y no tur ora tin tur solucion tampoco. Pero tin biaha bo mester traha cu mas partners den comunidad, por ta gobierno por tuma e prome iniciativa, duna e prome paso, traha cu mas hende den comunidad p’asina atende cu cierto problemanan”, Minister Arthur Dowers a argumenta.
