Curso yama ‘E-LOFA’ ta elemento importante den educacion di empleadonan publico

Ministro Geoffrey Wever:

• E lo mehora funcionamento di aparato gubernamental 

ORANJESTAD (AAN): Minister di Finansa, Asunto Economico y Sector Primario, mr. Geoffrey Wever, ta sumamente contento cu diamars 22 april 2026, durante un reunion oficial, Departamento di Finanzas a haci entrega di certificadonan na e participantenan cu a finalisa e modulo basico digital di e Leergang Openbare Financiën Aruba (E LOFA).

   E prome ronda di e modulo basico E LOFA a dura for di 1 di december 2025 te cu 6 di maart 2026. E modulo basico ta consisti di dies parti y ta basa riba e material actualisa di enseñansa LOFA. E curso aki ta den idioma Hulandes. E conversion di e material di enseñansa na un version online ta forma parti di Landspakket Tema A – Maneho Financiero y a wordo finansia door di e Ministerio di Asuntunan Interno y Relacionnan di Reino di Hulanda, cu e meta di fortalece e columna financiero dentro di Pais Aruba.

   Un total di 68 participante a finalisa e modulo basico y a ricibi nan certificado. E departamentonan cu a participa na e prome ronda di LOFA ta Inmigracion, Departamento Recurso Humano, Departamento di Asunto Social, Departamento di Impuesto, Departamento di Economia, Comercio y Industria, Centrale Accountantsdienst, Oficina di Integridad, Departamento di Inspeccion Tecnico, Bureau di Minister di Asuntonan General, Cultura, Medio Ambiente y Naturalesa, Bureau di Minister di Vivienda, Infrastructura, Servicionan Interno y Telecomunicacion, Bureau di Minister di Salubridad Publico, Asunto Social, Cuido di personanan di edad y Cuido di Adiccion, Cuerpo Policial y Departamento di Finanzas mes. 

   Di e 68 participante e siguiente tres participante a logra e score di mas halto: (*) Angelique Bagheri di Departamento di Finanzas. (*) Sharon Meijer-van der Linden di Departamento di Economia. (*) Lionel Rosel di Departamento di Centrale Accountantsdienst.

   E modulo basico ta destina pa tur hende cu ta involucra den e funcion financiero di Pais Aruba y ta hopi adecua pa e entrenamento di empleadonan nobo den un funcion financiero. Departamento di Finanzas a cuminsa caba cu preparacionnan pa e di dos ronda di e modulo basico y pa un prome ronda di e modulo avansa Cuadro Huridico. Door di digitalisacion di e material di enseñansa LOFA y e ofrecemento di e curso via un plataforma digital, e diferente modulonan por wordo ofreci regularmente. Di e manera aki, empleadonan publico por sigui e curso na nan propio tempo y asina paso pa paso profundisa nan conocemento di finanzas publico.

   “Un pabien grandi na tur e funcionarionan publico cu a participa y a completa e curso E-LOFA. Danki na Departamento di Finanzas pa tur nan trabao den esaki y danki na Hulanda cu por medio di e Landspakket ta yuda Pais Aruba inverti den mihor educacion di empleadonan publico y mihor funcionamento di e aparato gubernamental,” Minister Wever a declara.