Landa Merryweather:
ORANJESTAD (AAN): Den un discurso profundamente emocional, Landa Merryweather, representante di e famia propietario original di Cas Veneranda, a comparti su historia personal riba e cas di su grandinan, un lugar cu tabata mucho mas cu djis muraya y dak, pero un espacio yen di amor, union y recuerdo di famia.
Landa a describi con den e cas ey famianan tabata reuni, celebra, y mantene tradicionnan cu tabata forma parti di bida diario. Tabata un hogar unda disiplina, alegria y amor a contribui na forma e identidad di diferente generacion.
Segun Merryweather, e decision pa laga e propiedad bay no tabata facil. Tabata un momento di emocion profundo, mescla cu dolor, pero tambe cu gratitud, gratitud pa e oportunidad pa mira e cas restaura y preserva pa futuro generacionnan.
“Aunke e apariencia di e cas a cambia, su esencia nunca lo perde,” Landa a expresa, enfatisando cu e memoria y significado di e luga lo sigui biba den su famia.
Den su discurso, e tambe a reconoce e rol importante di Minister Geoffrey Wever, kende a impulsa e proceso y a traha pa haci e restauracion di Cas Veneranda un realidad.
E historia di e famia ta conecta naturalmente cu e vision mas amplio di Gobierno, bou liderazgo di Minister Mike Eman, pa revitalisa centro di Oranjestad, un enfoke cu ta combina preservacion di patrimonio, activacion cultural y mehora di calidad di bida.
Cas Veneranda ta awo un ehempel di con e colaboracion entre famia, gobierno y comunidad por crea algo mas grandi cu un simpel acuerdo: un espacio unda pasado y futuro ta topa.
Pa e familia, e sentimiento ta significa: orguyo. Orgullo di mira cu un cas cu a forma parti di nan historia, awo rescata y cu su legado lo sigui biba pa generacionnan cu ta bin.
{gallery}Cas Veneranda ta mas cu un edificio, e ta un legado di amor{/gallery}
