Luenne Gomez-Pieters di DIMP
ORANJESTAD (AAN) Den conferencia di presa, Dialuna 4 di mei, Directora di Departamento di Impuesto, señora Luenne Gomez-Pieters, a expresa cu esaki tabata un momento historico, tanto pa e personal di DIMP mes como pa e comunidad di Aruba henter, pa motibo cu loke tanto e contribuyente tabata spera, a bira un realidad. Esta, e lansamento di e proyecto di Portal Digital.
“Despues di trabaonan incansable tras di cortina, lunanan largo di trabao na nos Departamento di Impuesto, awe nos por anuncia oficialmente cu e ‘Portal BO impuesto’ (BOi) cu ta e portal oficial di Departamento di Impuesto, ta habri su portanan pa servicionan digital extra, pa medio di e portal aki.
“Pa prome biaha den historia bo lo por wak tur informacion di e comunidad, den bo mesun cas of oficina, y esaki ta conta tanto pa presentacionnan priva y tambe pa comerciantenan y of companianan” director di DIMP, Luanne Gomez-Pieters a señala.
El a agrega cu esaki ta nifica pa e contribuyentenan, cu e por mira un resumen di su cuenta online riba “BO impuesto Portal”. E por mira e sumanan cu ta habri, y hasta e por mira tambe sumanan cu tin den restitucion.
El a agrega cu no solamente por duna e suma na e contribuyente cu ta registra caba den “Nos Portal di Impuesto”, pero awo a habri e posibilidad pa nos comunidad henter, y pa cada contribuyente individual, por cuminza haci su peticion di “User Name”, un password, p’asina aki e por tin acceso na su informacion di impuesto.
“Esaki ta un momento historico pasobra esaki t’algo cu nos contribuyentenan tabata tin añanan cu ta pidi p’e. E servicio cu nos ta brinda e contribuyente, lo no mester manda un email mas pa por haya su resumen di debenan habri na Departamento di Impuesto, y tampoco no mester manda un email of yama nos funcionarionan publico pa por cera un areglo di pago. Esey ta un siguiente servicio cu nos ta brinda, caminda e contribuyente, comerciante, cu ta registra caba den nos portal, no mester bay registra su mes di nobo, pasobra e tin informacion di impuesto di su compania pasobra e tin informacion di su mesun man, pero nos como contribuyentenan individual, na momento cu nos registra pa ta un usuario di nos portal, por bay mira no solamente e resumen di su estado di cuenta, pero tambe por cera un areglo di pago den nos Portal BO impuesto”, Gomez-Pieters, director di DIMP, a reitera.
