Greg Peterson, Presidente Aruba Birdlife Conservation:
ORANJESTAD (AAN)-- Señor Greg Peterson, presidente di Aruba Birdlife Conservation, den su entrevista cu Matutino DIARIO, a referi tambe na e dañonan cu e vehiculonan ATV y UTV ta causa na Aruba su naturaleza, y esaki ta abarca flora y fauna.
Greg Peterson a indica cu e companianan cu ta opera e autonan aki, a wordo invita pa participa den e Conferencia Internacional di Shoco cu ta cuminza dialuna cu ta bin, 7 di September, pero aparentemente, nan no tin ningun idea di e motibo pa cual nan a wordo invita.
“Nan no tin ningun idea cuanto nan ta destrui y esaki ta un bon momento pa cuminza siña con pa aprecia bo pais y ban drecha pa sigui bay dilanti”, señor Peterson a expresa.
Peterson a señala cu Aruba ta un di e paisnan cu ta como sesenta aña atrasa, anto a bira tempo pa nos “catch up” anto esey ta e meta awo. “Y nos kier hacie na un manera bon fundamenta. Nos ta buscando ideanan cu nos sa kico tin pa nos por tuma e decisionnan di maneho, na un manera corecto”, Greg Peterson a señala.
El a agrega cu dia 10, parti atardi ta bay haci un sorto di rondleding pa mustra e santuario. Pa mas informacion por subi e Facebook page di Aruba Birdlife Conservation, unda por informa tocante prijs di entrada y tur loke esaki ta cubri, por ehemplo cuminda durante henter e conferencia.
