Cuida bo curpa y evita problema cu riñon ta responsabilidad y disciplina di e ser humano

Miluska Sneek di Fundacion Kidneys 297:

*Por ehemplo bebe suficiente awa 

ORANJESTAD (AAN) – Miluska Sneek, di Fundacion Kidneys 297, a comenta den entrevista cu DIARIO, cu tin retonan pa loke ta trata cuido di riñon, pasobra e fundacion ta keda trece e palabra dilanti, pero e ta responsabilidad di e ser humano pa cuida su curpa; entre otro, bebe suficiente awa.

Eynan ta unda e fundacion ta purba di yega, pasobra e mester ta un comportacion activo di e ser humano, un disciplina.

“Nos por duna informacion pero si bo haci nada cu e informacion nos no por forza bo. Ta boluntad propio ta pone cu bo por haci un cambio den bo bida, vooral no warda, pasobra nos ta concientiza esaki, te ora bo haya bo cu malesa cronico, pasobra ya e por ta laat caba. Bo por haci cambionan pero si bo haci’e for di awo bo ta evita di haya bo den un situacion cu bo no kier ta, pasobra e tratamentonan ta pisa”, Sneek a señala.

Miluska Sneek a indica cu enberdad tin hopi pashent na Aruba cu ta dializa. Pero tambe e ta mira cu hopi fundacion na Aruba, ta keda promove pa come saludable, pa haci actividad fisico, informa nan mes, bebe awa, pero e ta keda na e persona. “Pues, mi ta kere cu nos ta bay den e bon caminda, pasobra tin hopi hoben y e comunidad, ta participa den hopi caminata,  pasobra durante e aña no solamente fundacionnan, scol y organizacionnan, ta introduciendo mas y mas caminata, cual ta promove haci actividad fisico. Pero tambe tin cu pone un tiki mas tempo den e parti di alimento”, Sneek a subraya.

Por ehemplo, kico e ciudadanonan ta come, si tene cuenta cu bebe awa pasobra esey ta casi 80% di hiba un bida saludable. “E hecho cu hopi hende no gusta bebe awa por ta un mito, of e smak, pues toch ta dura un tempo prome cu e persona haya su mes cu e malesa anto door cu tin esey, bo ta keda cu e flexibilidad di pensa ‘ah no, mi ta hacie mañan’ y asina añanan ta pasa y nunca ta yega. Anto, nos tin otro alternativanan pa nos bebe, y esey ta pone cu bo ta laga awa un banda. Nos tin e facilidad di tin e miho awa na crenchi pues no ta costa bo nada tin bo boter yena, bo canica, prepara bo mes. Mi ta kere cu esey si hopi hende a cuminza introduci, y si bo cuminza bo dia cu e boternan yena e ora bo sa cu bo ta bebe awa suficiente durante e dia”, Miluska Sneek a remarca.