Estudio di IOM Aruba mustrando resultado riba impacto economico di e migracion venezolano na Aruba

Alena Samanez, project coordinator ta splica:

*Tin rond di 5 mil venezolano cu a busca asilo na Aruba 

ORANJESTAD (AAN):   Diabierna ultimo na Cas di Cultura, tabatin presentacion di e resultadonan di un estudio cu a wordo haci door di e Organisacion Internacional pa Migracion (IOM) y UN Migration Aruba. Ta trata di un estudio di e impacto economico riba e migracion Venezolano na Aruba.

            E estudio aki, cual a ser conduci pa Equilibrium (un compania consultor pa desaroyo social), ta ofrece datonan completo riba e impacto economico di e migracion Venezolano riba e economia local. E ta profundisa den diferente aspecto, incluyendo dinamica di e mercado laboral, utilizacion di servicio publico, y tendencianan economico mas amplio afecta pa e fluho di e migrantenan Venezolano pa Aruba.

            Ta considera cu e hayazgonan di e estudio aki ta di importancia maximo pa forma politicanan y strategianan pa atende e retonan y oportunidadnan asocia cu e migracion Venezolano den nos region.          Alena Samanez, Project Coordinator IOM Aruba, ta splica e reunion y presentacion na Cas di Cultura y a bisa cu e estudio aki a bin ta tumando for di 2 aña caba a base di e 'skills profile' di e venezolanonan cu ta bibando na Aruba.

            Ta complementa e estudio ey door di calcula den un forma hopi conservativo, data di e cantidad di personanan indocumenta akinan na Aruba, e cantidad minimo cu tin identifica y e cantidad di esnan cu ta busca asilo na DIMAS, cu ta den promedio 5 mil persona.

            Samanez a agrega cu probablemente e number ta mas halto cu esey y por ta dobel. Pesey a bay den e forma mas conservativo cu tin.

            Di esey a calcula cual ta e contribucion fiscal di e 5 mil personanan aki. A calcula esaki cu 'minimumloon' locual ta nifica cu e personanan aki no lo contribui cu Inkomstenbelasting pero si cu AOV, AZV y cu otro tipo di impuestonan. Por ta nan contribucion for di nan salario no ta hopi halto, pero nan dunado di trabao si tin cu paga esey.

            E compania di consulting a duna di conoce cu aworaki e contribucion di e personanan aki na ta cero y cu e calculo aki sa cu nan contribucion lo ta rond di 13 miyon dollar na e diferente departamentonan di Aruba, Samanez a señala.

            El a enfatisa cu e estudio aki ta pa mustra e oportunidadnan cu tin y inserta un forsa laboral hoben den economia. Manera ta conoci tin un proceso di 'vergrijzing' na Aruba y esaki ta preocupante.