Cu restauracion di Cas Veneranda e compromiso pa revitalisa Oranjestad ta continua

Ministro Geoffrey Wever:

ORANJESTAD (AAN): Den presencia di Stichting Monumentenfonds Aruba, APFA, Famia Arends y invitado nan, Minister Geoffrey Wever a anuncia cu compra y restauracion di Cas Veneranda ta un hecho. Despues di un proceso largo y complica   a logra den colaboracion cu Ministerio di Asuntonan Economico, Communicacion y Desaroyo Sostenibel, Stichting Monumenten Fonds Aruba, famia Arends, Nationaal Restauratie Fonds y APFA  e restauracion di Casa Veneranda.

   Minister Wever: “Promer cu mi a bira minister ya semper mi tabata tin e deseo pa mira e edificio historico aki restaura y manera mi a bira minister mi a acerca Señora Anne Witsenburg di Stichting Monumenten Fonds Aruba pa nos cuminsa traha riba esaki. Nos vision ta pa converti e centro di Oranjestad den un centro di gastronomia y vivienda y pa por logra esaki nos como Gobierno ta purba trece hende back den centro di ciudad, entre otro door di trece nos departamentonan back den centro di Oranjestad y cu e intencion ey mi a cuminsa traha riba e proyecto aki.

   Cu e compra y restauracion di Cas Veneranda nos ta duna contentido concreto na nos vision. Di e forma aki un edificio historico ta worde rescata y restaura y gobierno lo bay ubica Departamento di Asuntonan Economico, Comercio y Industria den Cas Veneranda. Tambe lo ta bay tin un espacio pa verhuur pa un café y nos lo construi un conference room/meeting room cu por worde usa door di interesadonan. Mester menciona tambe cu a tene cuenta cu sostenibilidad, lo tin solar panels y sistema di awa eficiente, asina nos ta cumpli cu nos otro compromiso pa haci Aruba un isla sostenible”.

   Minister Wever a menciona den su discurso cu e proyecto importante aki pa centro di Oranjestad a bira un realidad door cu hopi hende a duna nan ayudo y sosten y algun persona a traha super duro cu hopi determinacion pa por a logra esaki. Minister Wever a gradici coleganan ministers, especialmente Minister-President Señora Evelyn Wever-Croes pa su ayudo y sosten, Staten di Aruba y diferente departamento di Gobierno, manera DWJZ, Directie Financien, CBOS, Directie Cultuur, DOW y DIP.

   Minister Wever a gradici especialmente Señora Anne Witsenburg y Señora Daphne Every di Stichting Monumenten Fonds Aruba cu desde inicio a kere den e proyecto aki y a traha incansablemente cu un pasion grandi y cu profesionalismo.

   Señora Witsenburg y Señora Every a traha riba e diseño, riba e indeling, riba e parti financiero, nan a percura pa busca fondo nan Hulandes na 2% pa e restauracion y fondo na APFA pa yuda financia e compra y a negocia cu e doñonan di Cas Veneranda, esta famia Arends pa por a cera e acuerdo di compra. Minister Wever a gradici tambe señora Landa Merryweather cu a confia cu Stichting Monumenten Fonds Aruba hunto cu Minister Wever lo por realisa e proyecto aki.

   Minister di Asunto Economico, Comunicacion, y Desaroyo Sostenibel a realisa cu pa por logra cumpli cu su promesa pa revitalisacion di Oranjestad, lo mester uza parti substancial di su propio presupuesto pa financia e transformacion aki.  Den un forma di un subsidio Minister Wever, cu aprobacion di Parlamento a logra traspasa na Stichting Monumenten Fonds Aruba e prome parti di e total inversion cu tabata necesario pa efectua e compra di edificio. E subsidio sinembargo, no tabata suficiente, y e compromiso di parti di gobierno pa huur e edificio aki tabata cardinal pa por a ricibi financiamento. Asina Departamento di Asunto Economico, Comercio, y Industria cu ta resorta bou di Minister Geoffrey Wever, a haya un cas nobo.

   Cu e compromiso aki  Stichting Monumenten Fonds Aruba, a logra haya e prestamo  necesario di Nationaal Restauratie Fonds  na un interes di 2% y alavez financiamento local di APFA pa a completa e total inversion.

   Embeyecemento di nos centro di ciudad solamente no lo “translate” na e ciudad vibrante cu nos tur ta anhela. E ta tuma un compromiso serio di parti gobierno pa haci e imposibel, posibel. Inversion den e iluminacion, vegetacion, seguridad, parkeo y infrastructura di e ciudad ta facilita e crecemento. Trece departamentonan di gobierno den caya, ta crea un fluho automatico di hende cu ta trafica den e area, un fluho diario durante dia den nos centro di ciudad, cu lo ta cliente pa e negoshinan den Playa.  

   Minister Geoffrey Wever, su intencion ta pa sigui sondea e posibilidadnan pa trece mas di nos departamentonan den nos centro di ciudad. Haciendo e stap grandi pa rescata e edificio historico  aki, ta un “move”clave y tambe un ehempel bibo di con nos lo por restaura edificionan bandona,  conserva e identidad di nos centro di ciudad y na mes momento inyecta e fluho di hende necesario pa sostene comercio den nos centro di cuidad.