Atrobe Elmar kier un break di e CAO nobo
- Trahadornan ta mirando Elmar cu sponsorship tur caminda
- Mester por tin placa tambe pa yega porfin na un CAO nobo
ORANJESTAD (AAN): E situacion di e trahadornan di NV Elmar ta sigui di ta tenso. Segun Diego de Cuba di Sindicato STA, a indica cu e no ta kere cu e supuesto problema di fondo pa por sigui negocia e Contracto Colectivo nobo na e compania, ta algo cu ta existi.
E problema mas bien ta di ariba, caminda cu calculacionnan tin di wordo haci, y e promesa di baha tarifa di awa y coriente tey, si tin espacio pa esey no ta conoci. Pero esaki no por perhudica un negociacion pa un CAO. Esaki ta asuntonan cu Sindicato ta mustra hopi biaha cu ta cifranan cu ta wordo presupuesta y cu ta wordo negosha riba dje extensamente.
Sindicato STA tin negociacion andando cu NV Elmar desde September 2022 caba riba e CAO nobo aki. Awor e ta yegando na un “point of no return”.
No ta prolonga CAO bieu mas: Segun Sindicalista Diego de Cuba a splica cu nan no por bay prolonga e CAO bieu mas. Awor ta un CAO nobo mester wordo firma.
El a admiti cu nan ta basta leu den e negociacionnan cu NV Elmar, y atrobe na e compania ta tristo pa bisa cu den tur e problema di placa cu tin, toch bo ta mira algun Auto Electrico costoso cu ta costa mas di 100.000 Florin, incluyendo sportscar costoso! Esey ta preguntanan cu trahadornan tambe ta haciendo.
Elmar cu sponsor na monton: Sindicato ta contento cu NV Elmar ta patrocinando diferente instancia y organizacion, y sa cu esey ta yuda comunidad. Companianan semper fuerte por haci e topo di patrocinio, y diferente compania di Gobierno ta haci esey pasobra e ta yuda e pais, y e instancianan ey cu tin mester sigur di dje.
Sinembargo si tin placa pa sponsorship, lo mester tin placa pa CAO nobo tambe. Pues no bin cu storia cerca nan cu pa e empleadonan mes no tin nada, pero pa patrocinio si tin.
Aki ta unda cu e negociacion ta pega, segun de Cuba a indica. Y e situacionnan ey ta bay publico y nan ta mira nan socede, y asina diripiente ta haya tende cu den gerencia tin conflicto atrobe, Ministro ta ranca aki, otro ta ranca aya... y na final ta e trahador cu ta man cruza tin di bay sali perhudica di e situacion aki.
Lo cuminza pone forza: Riba e indicacion cu atrobe traadornan ta sali perhudica, el a duna un reaccion. “No! Absolutamente cu no! Nos ta bay forza awor,” ta loke Diego de Cuba a bisa! Pasobra nan a ricibi un carta di e team negociador di NV Elmar, unda nan ta bisa cu tin di stop e CAO nobo un rato pasobra tin un dilemna riba tarifa di coriente, etc.
“Pa Sindicato STA, e storia ey a caba! Awor ta pone forza pa finaliza e Contracto Colectivo nobo, sino nos ta dal abao, y cla!”
E mensahe aki cu Elmar kier un ‘break’ di negociacion, ta algo inaceptable pa Sindicato STA. De Cuba a indica cu nan por bay den accion di protesta pa loke ta pasando.
“Corda bon cu Sindicato STA a yuda e compania y e trahadornan tambe. Awor e momento a yega cu bo ti ndi keda cla cu e CAO, y awor pasobra un baranca grandi a bin den bo caminda, bo tin di tranca cos atrobe?”
Elmar mes tin di fix su problema: STA ta bisa Elmar pa nan soluciona nan problema, y despues bin soluciona e problema di CAO pa empleadonan.
“Acaso NV Elmar ta bay baha tarifa di coriente asina tanto, cu e compania ta bay ta den un situacion caminda cu no por cumpli cu exigencianan cu Sindicato a trece riba mesa pa e CAO nobo, esey no ta berdad.” Pasobra Sindicato y Elmar ta hopi leu caba den negociacion y no falta mucho pa firma esaki.
Sindicato a manda un carta atrobe pa Ministro Glenbert Croes pa un reunion cune, pero te ainda no a haya contesta. Esaki tabata Carta No. 3 manda pa Ministro, como cu nan kier splik’e na placa chikito ta kico ta pasando cu e negociacion di CAO nobo.
E Sindicalista no a duna indicacion si acaso e protesta aki start, ta ki tempo lo haci esey. Pasobra ta obvio cu tin di bay consulta cu e miembronan prome riba e detayenan ey.
