Minister Xiomara Maduro:
*Aruba por haya refinanciamento condiciona
ORANJESTAD (AAN) – Den conferencia di prensa di Diahuebs ultimo, Minister di Finanzas y Cultura, mr. Xiomara Maduro a hiba palabra, y a elabora tocante e temanan: “Relato di biahe pa Hulanda y Washington”, y “Nota di comienzo di aña”.
Minister Maduro, refiriendo na e biahe na Hulanda, el a bisa cu importante ta e refinanciamento di e debe cu gobierno a acumula, durante e periodo di pandemia, pues e debe di Covid-19. E dignatario a señala cu, cu esaki mester a haya e claridad di e condicionnan cu si mester paga bek of no, y con esaki ta.
E mandatario, mustrando graficonan, a señala cu e debe cu Aruba a acumula ta di 916 miyon florin. Hulanda a bisa enfaticamente cu e no ta exonera Aruba di e debe y tampoco na otro paisnan den Reino. Kiermen, e debe cu a acumula cu Hulanda pa durante e pandemia Hulanda no ta bay duna ningun pais exoneracion, pero si a indica cu Hulanda ta dispuesto pa refinancia e parti di e debe aki.
E debe aki tabata entre otro, sosten di likidez y tambe e fondonan pa por a brinda subsidio di salarario. Tur esaki hunto a forma 916 miyon florin y esaki ta locual nan a indica di ta dispuesto pa refinancia.
E condicionnan, te aworaki, di locual e mandatario a haya un bista riba dje, ta cu di un banda si Aruba acepta, e supervision financiero den un Ley di Reino (RAft) Hulanda lo ofrece Aruba un interes cu nan mes ta paga ora nan fia placa, riba mercado internacional.
“Esey kiermen cu si Gobierno di Aruba ta refinancia via Hulanda, no ta bay ta 0%, manera cu ta wordo pensa riba dje, pero ta bay ta e interes cu Hulanda mes ta haya ora e ta fia placa riba e mercado internacional”, e mandatario a reitera.
Riba esey Hulanda lo cobra Aruba tambe un margen di ganashi pa e riesgo cu nan ta core cu e debe aki.
Esaki ta e condicionnan si Aruba financia via RAft, e dignatario a remarca.
Si Aruba ta keda cu e supervision financiero manera tine aworaki regla den e Ley di LAft (Landsverordening), e ora ey nan por yuda Aruba pero na e interes cu nos pais ta haya riba mercado internacional. “E condicionnan mes completo ainda nos no tin, aworaki nos ta warda tambe riba un proposicion concreto di Hulanda, pues e palabracion cu e Secretario di Estado eyden, a duna un par di detayenan. RAft pa Hulanda ta keda un condicion; di otro banda nan ta dispuesto pa refinancia, pues esey ta un bon noticia con cu bay bin, pero no tin exoneracion, no tin interes na 0% sino e interes cu nan mes ta haya, mas un margen riba dje”, e dignatario a remarca.
