Cruz Cora a organiza un ‘Drive-By’ pa recauda articulonan di scol pa muchanan den necesidad

ORANJESTAD (AAN) – Indra Pereira,  Manager di Operacion y Marketing di Cruz Cora,

den entrevista cu DIARIO a splica tocante e donacion estilo “Drive by”, cu nan a realiza Dialuna di e siman aki.

   Nan a haci un yamada pa comunidad cu por a haci donacion di paña y articulonan di scol pa mucha (entre otro, keds, jeans, tas, etc) nobo y uza pero den bon condicion, logicamente.

Nan a haci e actividad aki cu dos proposito: material uza a bay pa e dos shops di Cruz Cora, esun di Dakota y esun di San Nicolas unda cu pa un prijs di dos florin por cumpra un jeans y otro productonan uza.

E fondonan cu nan ta recauda ta wordo reinverti den ayudo social, segun Indra a comenta.

Encuanto paña y articulonan nobo ta wordo uza pa un proyecto cu Cruz Cora tin hunto cu trahadornan social di scolnan. Siman pasa nan a comunica cu otro, y e trahadornan ta bezig ta meld an via email. E articulonan nobo lo wordo duna na e trahadornan social di scol, pa nan reparti entre e muchanan den necesidad.

Personanan cu kier haci donacion por pasa na Cruz Cora libremente, entre 8 or pa 4’or, na Dakota of na San Nicolas. Indra a menciona cu nan ta bay ta henter un luna bezig ta empaketa loke e trahadornan social ta bay haya pa cada scol y asina por distribui tur cos.

Tin trahadornan social di DAS cu tambe a yama Cruz Cora pa nan manda algun articulo escolar pa nan, pa nan tambe por yuda algun mucha.