Exitoso anochi informativo tocante riñon organiza pa team di dialisis HOH

ORANJESTAD (AAN): Departamento di Dialisis di Horacio Oduber Hospital a organisa un anochi di informacion di riñon.

Esnan presente a haya un checkeo gratis di salud entre otro check presion di sanger, sucu, colesterol y peso y a ricibi informacion amplio relaciona cu cuido di riñon. 

Rachel Kraaijvanger, manager di departamento di Dialisis, a duna di conoce cu na luna di maart a organisa un anochi di informacion na MFA Paradera, y awo a toca turno pa MFA Savaneta.

Un sala completamente yen ta duna e satisfaccion di mira e acogida grandi, pero alabes ta duna e impresion cu hende mester di informacion. P’esey a dicidi cu lo brinda mas anochi asina ki e aña aki ainda pero na e otro dos MFA na Aruba.

Ta importante pa tur esnan interesa haya e oportunidad pa haci un checkeo di salud y pa comparti cu nan tur informacion pa tin un dieta balansa, pa cuida e salud y sa con importante e dos organonan aki ta den nos curpa. 

Durante e anochi aki nefrologo Romeo Kock a duna un charla tocante riñon y con pa cuid’e. Alabes Frans Kock, opticien di Kock Optica a elabora tocante bista; ki efecto problema di riñon por tin riba bo bista y a duna algun conseho.

Enfermera Raysa Carolina a brinda informacion tocante e trabou di dialisis y colega Maysa Chalabi, trahado social na departamento di dialisis, tambe a duna conseho y brinda informacion importante riba e parti social cu un persona cu problema di riñon por encontra.

Un di e topiconan cu tur hende gusta ta e dieta. Geraldine Jean-Baptiste, kende ta dietista, a splica riba e parti di producto y por ehemepel e cantidad di salo den nan. Ela trece diferente producto pa asina e publico por visualisa e problema di cierto cuminda y bebida. 

Sra. Jinan Dirksz, participante, ta conta cu ela bay hunto cu su yiu e biaha aki p’e yiu mes haya sa mas di e enfermedad. E yiu di chikito tin problema cu riñon y awo cu e ta hoben ta bon p’e mes tene cuenta cu diferente aspecto. E yiu a haya e anochi di charla interesante, specialmente e parti di cuminda. E ta gusta “easy food” y mayoria cos cu e dietista a bisa ta loke e hoben ta come.

E yiu mes despues di e charla a indica n’e mama cu nan tin di bay adapta cierto habito cu e tin. Na final e ta conta cu ta importante pa cuida riñon y pa tene bo mes na altura pasobra di pafo kizas ta mustra cu no tin ningun molester pero paden bo no sa kico por ta pasando den e curpa. 

Participante Erna Geerman ta conta cu e tabata presente pa mira con su situacion ta. El a subraya di a haya e charla hopi bon. E ta educativo y bo ta haya e oportunidad di sa mas kico e enfermedad di diabetes ta. Su persona mes tin presion halto y aki el a haya oportunidad di sa con pa baha peso pa asina e no tin di yega e extremo di diabetes. El a recomenda henter pueblo di Aruba pa participa n’e programa aki di hospital, pasobra ta haya hopi informacion cu algun hende kizas no sa, manera maluzo di salo y sucu. 

Keda pendiente y no perde e oportunidad di asisti na nos siguiente anochi di informacion tocante bo riñon di HOH su team specialisa y di biaha haci un checkeo di bo salud.  Corda semper “Pa bo biba bon, pone atencion na bo riñon”.