ORANJESTAD (AAN): Dr. Jose Sprok, yiu di tera cu actualmente ta Decano di e Carera di Medicina na Universidad de Ciencias Médicas, UCIMED na Costa Rica,
a duna di conoce cu UCIMED a lidera e formacion di e profesionalnan den salud na Costa Rica, riba nivel priva, durante e ultimo 45 aňanan y awor, den e marco di su aniversario, a dicidi di amplia e oferta academico internacional cu e apoyo di e Grupo Galileo Global Education, cu kende a firma un aliansa na december 2022.
Den e caso di Aruba y Corsow, for di varios aňa caba e futuro profesionalnan a scoge e pais centroamericano, ehempel di esaki, ta Dr. José Sprok, kende ademas di a gradua na UCIMED, actualmente ta e decano di e carera di Medicina.
Varios factor ta haci cu awendia e futuro profesionalnan ta demanda un formacion mas integral, c'un vision global cu ta prepara e profesionalnan pa responde riba e necesidadnan di salud di e poblacion mundial.
E Grupo Galileo Global Education, ta e mas grandi di Europa, den educacion superior priva, cu mas di 200.000 studiante y 100 campus den henter mundo, mientras cu UCIMED ta e universidad líder den formacion di e profesionalnan den ciencia di salud di regio.
Durante e aňa aki, UCIMED ta prepara su mes pa incursiona den un mercado mas competitivo, pero cu ta representa un oportunidad y crecimento y di expansion pa UCIMED.
E aliansa aki lo hasi e intercambio academico mas grandi cu otro institucionnan importante na henter mundo, tambe den innovacion y implementacion di productonan tecnologico y plataformanan educativo.
“E reto aworaki ta den forma profesionalnan cu un vision global, pasobra nos kier prepara nan no unicamente pa e necesidadnan di e poblacion den regio, sino tambe, pa atende e rekerimentonan di e mercado mundial. Tin problemanan di salud den otro paisnan den mundo y e obhetivo ta cu esnan gradua di nos universidad keda capacita y bon prepara pa atende e necesidadnan aki y, cu esey, nan por amplia nan vision y desaroya nan mes pa traha como profesionalnan rond mundo”, Dr. Sprok a remarca.
Hunto cu e acuerdo di e aliansa, e universidad ta celebra su aniversario, recordando algun di e logronan cu a marca historia den materia di salud y educacion, na Costa Rica como e prome universidad priva den ciencias de la salud, di e pais, prome universidad di Centroamerica y Caribe, den obtene e acreditacion internacional (WFME) pa su facultad di Medicina, entre otro.
