Diez scol di SKOA a participa na e simulacro di Caribe Wave 2023

ORANJESTAD (AAN): Tur aña ta tuma luga un simulacro di calamidad na Aruba caminda diferente departamento y organizacion ta participa a base di nan plan di siguridad.

E meta di esaki ta pa prepara pa cualkier tipo di calamidad manera entre otro tsunami, horcan, candela grandi cu por sosode ariba nos isla. E aña aki un total di 10 scol y e oficina di SKOA a participa na e Caribe Wave, caminda a practica e simulacro ora tin candela den e edificionan.

   SKOA como e organizacion di educacion di mas grandi na Aruba a traha ariba un “School Safety Plan” desde aña 2019 pa tur su scolnan. Bao di guia di BRA a ricibi un curso intensivo caminda a reuni un total di 10 biaha, prome cu a skirbi e “School Safety Plan”.

   SKOA  ta e unico organizacion di educacion cu tin un plan di siguridad en conexion cu calamidad pa nan scolnan. E meta principal pa tin un plan di siguridad, pa e scolnan, ta pa prepara tur maestro y alumno ora un calamidad sosode na e scol. Scolnan di SKOA ta prepara pa situacionnan di candela, “school-shooting” y otro calamidad di naturaleza.

   SKOA lo continua na participa na e simulacronan aki anualmente pa asina keda mantene e plan di siguridad aki den practica y relevante pa tur nan scolnan. E meta di esaki ta pa garantiza e siguridad di tur alumno y tambe maestro di e scolnan aki.