Ministro Thijsen a bishita burgemeester di Leeuwarden Sybrand Buma
ORANJESTAD (AAN): Informacion for di Den Haag ta indica cu durante un bishita na e capital di Provincia Friesland Leeuwarden, Minister Plenipotenciario di Aruba mr. Ady Thijsen a combersa cu burgemeester di Leeuwarden Sybrand van Haersma Buma.
Durante di un introduccion Minister Thijsen a ilustra su vision y maneho den su encuentronan cu diferente municipionan (Gemeente) cu e meta pa haci Aruba y Arubahuis mas visibel na Hulanda y yega na formanan di cooperacion pa cu Aruba. Asina sr. Thijsen a puntra tocante e industria di pesca na Friesland. Riba e punto aki sr. Buma a bisa cu e waf mas grandi di Friesland pa cu pesca ta Harlingen. Pero na mesun momento el a bisa cu e industria di pesca a cambia hopi door di regulacion di Union Europeo.
Riba dje door di Brexit, gran parti di Noordzee unda antes e piscadornan Hulandes tabata pisca a worde cera pa piscador cu no ta Ingles. Minister Thijsen a bisa cu su interes, ta pasobra Aruba ta rondona cu laman yen di pisca y actualmente pesca na Aruba no ta un sector di importancia. ‘E piscador local ta bay cu boto chikito pa pisca y pa bin bendenan canto di playa, dus tur esaki ainda ta riba un scala hopi chikito. Mi ta kere cu aki tin potencial grandi cu nos mester por bin na metodonan pa haci pesca na Aruba mas profesional,’ asina e mandatario a bisa.
Tocante e sector di agricultura burgemeester Buma a bisa cu Friesland ta conoci pa ta un provincial cu hopi agricultura, special batata. Tambe Friesland ta domina e mercado di lechi. Un di e companianan di lechi mas grandi di Friesland y di mundo ta Campina. Mirando e importancia di agricultura na Friesland, Hogeschool NHL Stenden tin estudionan den ramo di agricultura masha avansa. Esaki segun minister Thijsen lo por brinda oportunidad na hobennan Arubiano cu ta desea di bay den e direccion aki y por sigui un estudio asina. Minister Thijsen: ‘Aruba seriamente mester bin cu un maneho pa produci mas localmente y no depende totalmente riba importacion di fruta y berdura. Cu e conocemento adecua y e innovacion den agricultura, mi ta convenci cu Aruba por hopi mas riba tereno aki,’ asina Minister Thijsen a bisa.
Pa loke ta studia na Leeuwarden, burgemeester Buma a bisa cu Leeuwarden tin algun Hogeschool cu a atrae hopi studiante. Motibo di esaki segun sr. Buma ta e trankilidad di Leeuwarden y Friesland. Tambe e problema di scarcedad di camber pa studiante ta menos cu otro ciudadnan di Hulanda.
Finalmente burgemeester Buma a bisa Minister Thijsen cu semper e ta habri pa si Aruba mester, duna e sosten nesesario unda por. E mandatario a gradici burgemeester Buma pa esaki y tambe pa e recepcion hopi ameno. Despues a sigui intercambio di regalo como recuerdo di e bishita di minister Ady Thijsen na burgemeester di Leeuwarden Sybrand van Haersma Buma. E potret ta cortesia di Arubahuis.
