Cornelio Dirksz di Santa Rosa ta cla pa disfruta di su Pensioen

ORANJESTAD (AAN): Dialuna mainta y siman nobo cu luna nobo ta habri caminda Departamento di Agricultura, Cria y Pesca,

Santa Rosa a despedi di otro trahador, esta Cornelio “Esy” Dirksz kende ta forma parti di nos departamento for di aña 1999. Sr. Dirksz a drenta como contratado y despues a drenta den funcion oficial di gobierno di Aruba.

   Por bisa 27 aña di servicio di gobierna aki na Santa Rosa. Asina “Esy” su nomber di cariño manera nos ta yame. el a labora semper den e seccion di agricultura/horticultura. Tabata dos celebracion den uno pa motibo cu awe  ta su fecha natalicio. Cual nos ta felicite tambe.

  Un persona semper amabel y un persona cu nunca por a mira “Esy” rabia. Semper cu un sonrisa y cla p ayuda tur cliente cu yega aki na Santa Rosa. Semper dedica na su trabao di tur día y semper masha cumplido. Asina el a pasa su añanan aki den Santa Rosa y te cu día di awe caminda a yega e momento pa bay difruta di un pensioen bon mereci.

   Riba Dialuna mainta a prepara un momento masha bunita y special y ricibi’e. Cu decoracion pa asina felicite y gradici’e pa e trabaonan di tanto aña desplega aki na Santa Rosa. Director di Santa Rosa señora Nathalie Maduro a hiba palabra na e ocasion aki caminda a repasa den cortico e bunita experencianan cu nos colega “Esy”. Logicamente a prepara un binita regalo cu su nomber e fecha graba pa e por hiba como recuerdo. Despues di esaki a sigui un celebracion chikito caminda cu tabata tin pasaboca y cos dushi entre coleganan.

   Den nomber di Staff y Personal di nos departamento nos ta gradici Cornelio “Esy” Dirksz pa su esfuersonan haci durante tanto aña y sigur awo e por bay disfruta di un bon pensioen y merecidamente.