United Farmers Association of Aruba
ORANJESTAD (AAN): Na entrada di 2026, United Farmers Association of Aruba (UFA) ta expresa su speranza cu confianza pa e aña cu ta bini y ta reafirma su compromiso pa fortalece produccion local di cuminda como un pilar esencial pa resiliencia nacional.
E interupcionnan cu Aruba a sinti despues di e eventonan di 3 di januari na Venezuela, cu a resulta den cancelacion di hopi vuelo y inseguridad logistico, a sirbi como un recordatorio claro, similar na loke comunidad a biba aden durante pandemia di Covid-19, con rapido eventonan externo por afecta e cadena di suministro di e isla. E momentonan aki ta mustra cu soberania alimentario mester keda un prioridad strategico. Aruba no por perde di bista e lesnan siña den tempo di crisis, ora acceso na importacion por wordo limita y capacidad local bira crucial.
UFA constantemente a enfatisa e importancia di incentiva y proteha comunidad di agricultor. Agricultornan local no ta solamente productor di cuminda; nan ta un salvaguardia importante pa Aruba, manteniendo e conocimento, capacidad y infrastructura necesario pa garantiza continuidad di suministro di alimento ora sistema internacional ta wordo interumpi.
Mientras condicionnan regional ta stabilisa y mercado ta bolbe na normal, UFA ta adverti gobierno y comunidad pa no bolbe cay den un dependencia excesivo riba produccion importa barata. Accesibilidad di corto plazo no mester submina resiliencia di largo plazo.
Sosten politico continuo ta esencial, incluyendo acceso na tera, awa, utilidadnan electrico, financiamento y tecnologia, asina tambe extension y mehoramento di incentivonan fiscal existente cu ta permiti agricultornan local keda competitivo pa reinverti den sistema moderno di produccion, eficiente y sostenible. Esaki lo yuda garantisa cu agricultura local por keda viabel y competitivo na largo plazo.
United Farmers Association of Aruba ta mira 2026 cu bon speranza, convenci cu, cu prioridadnan claro y compromiso consistente, Aruba por sigui construi un sistema alimentario mas fuerte, mas auto-suficiente y mas resiliente, cu ta sirbi tanto e agricultornan como e comunidad mas amplio.
Esey ta loke United Farmers Association of Aruba ta representa y sostene agricultornan local, y ta boga
pa un sector agricola resiliente, sostenible y competitivo cu ta contribui na seguridad
alimentario di largo plazo pa Aruba.
