Consulta Trilateral na Curaçao tocante seguridad pa Region Caribe  

ORANJSTAD (AAN): E siman aki a tuma luga na Curaçao un consulta semestral trilateral entre socionan  envolvi di Defensa di Reino Hulandes, Merca y Francia.

   E consulta periodico ta forma parti di e “Joint Interagency Task Force South” (JIATF-S), un relacion colaborativo internacional y interdepartamental bao di guia di autoridad Mericano, cu ta enfoca su mes riba combati traficacion y contrabanda ilegal den Region Caribe.

   CZMCARIB na nomber di Reino Hulandes, ya pa mas cu 30 aña ta forma parti  di e organizacion JIATF(S) aki.

   Durante e consulta e delegacionnan a dialoga tocante asuntonan actual, inteligencia, operacionnan, conceptonan nobo y coordinacion di esakinan, cu mester guia na un miho  ehecucion  di e operacionnan conhunto contra narcotica.  E forma maritimo di operacionnan contra narcotica ta exitoso y ta yuda cu e combatimento di criminalidad transfronteriso den region.

    Tambe recientemente  e paisnan a colabora exitosamente riba e tereno aki.  Asina simannan cu ta tras di lomba a ehecuta un operacion contra narcotica entre Hulanda y Francia,  y na e momentonan aki intensivamente ta trahando hunto cu Merca. E barco di stacion Zr. Ms. Friesland ta ekipa pa esaki cu un ekipo di embarcacion Mericano di Wardacosta Mericano, y ta colabora cu un helicopter di Wardacosta Mericano ademas di barconan di Wardacosta Mericano.

    Cu e colaboracion y e consulta aki, socionan responsabel  pa defensa di Reino Hulandes, Merca y Francia, a subraya nan esfuerso conhunto pa un Region Caribe safe y stabil.