Door cu e tin di haber tambe cu salud publico:
ORANJESTAD (AAN) -- Manera ta conoci, recientemente Universidad di Aruba a fungi como anfitrion di e asina yama “International Conference Marine Sciences” 2025 (ICMS).
Durante e conferencia internacional di Ciencianan Marino aki, profesor Jose Ernesto Mancera Pinedo, di Universidad di Colombia, experto, entre otro, den e parti di floracion di alganan dañino den Lama Caribe, a referi na e tema, incluyendo e Syndrome di Ciguatera cu ta causa e toxicidad di e alganan nocivo.
Matutino DIARIO a haya e tema asina interesante, mirando cu e meta di e conferencia ta pa haci un investigacion encuanto e situacion di e alganan dañino den nos lama, a busca mas informacion tocante e tema.
E Instituto Internacional di Medio Ambiente y Salud, den un publicacion ta expone e alganan como organismonan microscopico cu ta biba den ambientenan aquatico y ta uza e fotosintesis pa produci energia di luz solar, mescos cu e plantanan. Por haya alga den tur tipo di awa natural, incluyendo awa salo, awa dushi, y awa “brackish” cu ta un mezcla di awa salo y awa dushi.
Algun tipo di alga ta produci toxina, debi na factornan ambiental manera luz, temperatura, salinidad, pH y e nivelnan di nutrient por stimula e produccion di toxina. E toxinanan di alganan libera den awa of e circulacion di aire, por daña seriamente, e personanan, pisca, animalnan, y otro partinan di e ecosistema.
E floracionnan algal nocivo (Harmful Algal Bloom) “HAB”, ta sosode ora e alganan productor di toxina ta crece den exceso den un curpa di awa. E crecemento excesivo aki, of floracion di alga, por wordo aprecia na simple bista y por ta di color berde, blou-berde, cora of maron, dependiendo di e sorto di alga.
Algun floracion ta facil pa detecta pero otronan ta dificil pa mira pasobra nan ta crece cerca di e fondo di e curpanan di awa. Kiermen, no ta posible distingui con djis wak so, si un curpa di awa tin floracion dañino.
Hopi factor por contribui na formacion di HAB. No obstante, compronde con e circumstancianan ta converge pa crea un floracion nocivo den alganan, ta un tema di permanente investigacion.
Maske e cientificonan sa cu cierto condicionnan ambiental, manera e temperaturanan mas halto di e awa durante verano y e exceso di fertilizante of desechonan d awa residual, procedente di “water runoff” ta desencadena e HAB, ainda ta wordo efectua mas descubrimento.
Asina cu e cambio climatico ta eleva, gradualmente, e temperatura di e tera, e cientificonan ta contempla cu HAB ta sosode cu mas frecuencia, ta mas duradero, mas severo, y ta presente den areanan geografico diverso. Den proximo edicion DIARIO lo publica mas tocante e tema aki.
E estudionan cientifico aki tambe lo tuma lugar na Aruba.
