Conseho di Ministro di Reino ta bay di acuerdo cu proposicion di ley pa finansa publico duradero na Aruba

Decision tuma Diabierna

• Ley di Consenso acompaña pa Ordenanza Lwho 

ORANJESTAD (AAN): Conseho di Ministro di Reino a bay di acuerdo cu e proposicion pa e Ley di Consenso di Reino finansa publico duradero Aruba (Ley di Reino HOFA). Cu esaki e consulta di internet di e proposicion di ley, por inicia. Cu e Ley di Consenso, Aruba, den colaboracion cu Hulanda, ta traha riba mantencion di finansa publico saludabel pa asina, riba termino largo, por inverti tambe duradero den futuro di e pais.

   E Ley di Consenso ta bay acompaña di e Ordenansa nacional pa garantisa finansa publico duradero (Lwho). Esaki ta un ley di pais Aruba mes, den cua ta incorpora e normanan pa e presupuesto publico Arubano. E normanan aki ta basa riba instruccionnan di Fondo Monetario Internacional y ta contribui pa balansa gastonan.

   Secretario di Estado Eddie van Marum ta contento cu e resultado obteni: “Presentacion di un proposicion di ley, ta marca un paso importante den e colaboracion entre Aruba y Hulanda. E ta un ehemplo di con bon cooperacion y constructivo por conduci na un resultado cu tur hende por ta orguyoso di dje. Cu atencion y respet pa puntonan di bista di otro y circunstancianan local, nos tin un proposicion pa un Ley di Consenso cu ta na interes di ambos pais. Aruba ta asumi responsabilidad pa e maneho financiero y ta haya mas espacio pa haci invershon den por ehemplo enseñansa, cuido y economia.” 

   Prome Minister Mike Eman riba esaki a declara: “E finalisacion di e acuerdo aki ta un inversion importante di Pais Aruba den su confiabilidad di cumpli cu palabracionnan haci. Un confiabilidad cu mester forma e base pa un relacion duradero den nos Reino, cu un vision renoba dirigi riba cooperacion strategico cu esfuerso conhunto pa e Bon Comun di Aruba, Hulanda y henter Reino.”

   Normanan presupuestario:  E Ley di Consenso di Reino finansa publico duradero Aruba ta regula e normanan pa logra y mantene finansa publico duradero. Tambe e ta regula e foma con Conseho di Ministro di Reino ta supervisa finansa publico di Aruba.

   Colegio supervision financiero Aruba (CAft), den cuadro di e supervision financiero, ta keda conseha tanto Aruba como Conseho di Ministro. E papel consultativo aki ta temporal y ta termina ora cu Aruba ta cumpli cu e normanan. Un Camara di Presupuesto cu Aruba lo institui, lo asumi e ora ey e papel di CAft.

   Interesnan mas abou riba fianzanan: E Ley di Consenso ta brinda Aruba hopi bentaha. Por ehemplo riba termino corto Aruba ta bay paga un interes mas abou pa fianzanan cu nan a haci cerca Hulanda durante e pandemia di Covid y Hulanda ta dispuesto pa refinansia debenan cu Aruba tin riba mercado di capital na Merca.

   E interes cu a spaar, Aruba por uza pa inversionnan den propio pais. Ademas ta bira posibel pa Aruba haci uzo di condicionnan faborabel cu Hulanda tin ora di inscribi pa fianza. Di e forma aki ta bira posibel pa Aruba fia capital contra un interes mas abou pa haci inversionnan publico. Esaki ta tene e peso di debe di Aruba limita.

    Aruba ta inclui ademas stipulacionnan adicional den su propio, regulacion nacional. Por ehemplo, na momento cu e Ley di Conseso di Reino drenta na vigor, Aruba lo institui su propio Camara di Presupuesto, como consehero di Parlamento Arubano y gobierno. Na momento cu e Ley di Consenso di Reino termina, e Camara di Presupuesto lo asumi e posishon di CAft. Cambia of stipula e regulacion nacional por solamente cu aprobacion di Conseho di Ministro di Reino. Den e proposicion di Ley di Consenso di Reino a incorpora cu durante cu e ta na vigor, lo evalua e ley cada cinco aña.