Art Week Aruba 2025 ta cuminza dialuna cu ArtTable y ArtFashion

ORANJESTAD (AAN):  ArtWeek Aruba 2025 ta bira realidad entrante 1 te 7 di september na San Nicolas, bao di e tema inspirante “Art for Justice.”

Dos evento spectacular ta habri e siman: ArtTable riba dialuna 1 di september y ArtFashion riba diaranson 3 di september.

   ArtTable ta inaugura e programa cu un mesa creativo grandi na Promenade di San Nicolas. Ta un invitashon pa pueblo henter, turista y amante di experiencianan unico pa bin pinta den aire liber, bou guia di artista local y internacional. Carchi pa ArtTable ta cien dollar pa persona, inclui material di arte, biña y snacks. Cupo ta limita, p’esey ta fundamental pa sigura bo carchi trempan via artweekaruba.com.

Tres dia despues, e catwalk di San Nicolas lo bira escenario pa ArtFashion: Justice on the Runway. Moda ta bira mensahe, cu diseñadonan local y internacional lo mustra coleccion cu ta pone husticia y inclusion den spotlight.

   Entre nos talento local, lo t’ey Elisa Lejuez presentando su coleccion “Themis, the Greek Goddess of Justice”, un colaboracion entre Maison Ryon y Yahaira Maduro, ademas di Ronchi de Cuba y su coleccion ‘Identidad 2025’. Carchi pa ArtFashion ta disponibel via artweekaruba.com y na Trash By Ronchi.

   E dos evento aki ta forma e antesala perfecto pa e gran Aruba Art Fair, cu lo tuma luga di 5 te 7 di september na San Nicolas. Pa esunnan cu kier biba henter e experiencia di Arte pa Husticia, tin un All-Access Week Pass pa un suma, cu ta duna entrada pa ArtTable, ArtFashion y tur tres dia di Aruba Art Fair.

    Forma parti di ArtWeek Aruba 2025. San Nicolas lo briya cu arte, moda y mensahe di husticia, y bo no kier keda afo.