Hose Figaroa, Presidente di FTA:
*A yega na dje a base di dialogo constructivo, seguridad y responsabilidad
ORANJESTAD (AAN) – Diabierna 29 di Augustus awo, tabata un dia significativo pa ANSA sigur, y pa FTA, unda cu ambos partido a yega na otro y a firma e contrato colectivo nobo, y na un forma exitoso.
Hose Figaroa, Presidente di FTA a expresa su satisfaccion cu e logro grandi aki:
“Awe ta un dia mas cu solamente pone riba papel nos acuerdonan, pero tambe e ta reafirma e conviccion di partidonan, tanto ANSA como di FTA, di husticia, stabilidad y respet mutuo, ta loke a guia eigenlijk, henter proceso den e negociacion aki. Kiermen, mi no ta bisa nada nobo. Mi kier menciona cu aviacion pa nos economia, ta algo sumamente importante. Aviacion no solamente ta carga cu ne economia pero ta representa un sector cu hopi responsabilidad y hopi seguridad, tambe”, Hose Figaroa, a señala.
El a acentua cu e responsabilidad y seguridad aki, ta den man di un grupo di trahado cu hopi dedicacion. Esey ta e grupo di trahado cu ta labora pa ANSA, cu ta sinta eynan den toren ta guia e avionnan na momento cu nan yega Aruba y sali for di Aruba.
“Pues, mi ta kere cu ta importante sigur pa e sensibilidad di nan doño di trabao, cu ta negocia pa nan condicionnan di trabao ta bon. Nos ta satisfecho di e banda ey. Nos a yega na un acuerdo basa riba dialogo constructivo, riba profesionalismo, y tambe, mi ta kere, cu e conviccion di ambos partido pa yega na solucion”, Hose Figaroa, lider di FTA a ratifica.
Figaroa a señala cu e Contrato Colectivo aki ta vigente pa tres aña, y tur beneficio cu a logra ta reparti den e tres añanan nos dilanti.
