Conocido locutor Roberto Geerman a fayece inesperadamente

Gran baluarte di radiodifusion na Aruba

ORANJESTAD (AAN): Su nomber di berdad ta Robert Francisco Geerman.  Dialuna mainta e noticia tristo a drenta cu el a hala su ultimo rosea, y a pasa pa mundo celestial cu 62 aña di edad.  El a nace na Aruba dia 23 Augustus 1959.  E ta un di e locutornan mas respeta y balora na Aruba e ultimo decadanan aki.

   Pero pa tur hende e tabata conoci como Roberto Geerman.  Dado momento na comienzo el a hasta usa e nomber ‘Roberto A. Geerman’, aunke esey no tabata su inicial.  Debi na su curpa diki, el a yama su mes tambe como “El Gordo que Produce”.  Su voz tabata perfecto pa radio, y su dominio di papia rapidamente, a yude tambe despues bira narador deportivo.

   Su emisoranan favorito: Tabata na 1979 cu Roberto a cuminza traha na Radio Antillana cu ta transmiti riba banda AM na 1270 kHz.  Aki el a cuminza bira popular, y despues di esey a muda pa e emisora Radio Carina FM na 97.9 MHz cu e tempo ey tabata esun mas sintoniza rond di Aruba.  Despues di 1985 el a pasa pa Canal 90 FM, unda el a produci diferente programa, incluyendo eventonan interactivo cu el a bira conoci pe.  Tambe e tabata toca na Voz di Aruba riba banda AM na 1330 kHz.

   Por corda su campaña di “SOS” durante di Campamento di Bierna Santo y Pasco Grandi, unda nan tabata haci uso di e Mobile di Canal 90 y tambe un di e prome wireless mic di Aruba pa transmiti for di hasta sinta riba beach.

   El a crea un sorto di Car-Rally y Scavenger Hunt tambe na 1988 cu yama ‘Triki Traki’, unda henter anochi oyentenan ta scucha tips di Roberto pa asina nan por core acudi na negoshinan pa purba rij prijs di cierto producto.

   Kizas hopi hende no sa, pero na 1987 tambe el a cuminza skirbi un columna semanal den e matutino Corant e tempo ey, y tabata dirigi su mes riba farandula mundial.

   Despues di keda hopi tempo cu Canal 90, el a pasa pa Radio Galactica FM na 99.9 MHz.  Pero tabata colabora cu hopi placer cu diferente emisora, pues bo por a scucha su voz resona na diferente radio riba e isla.

   Den su trayectoria, el a cubri e.o. Arubadag na Hulanda, Festival di Tumba Korsou, Evento di Aruba Tourism Authority na Miami.

   Pasion pa Carnaval: Pero su eventonan di mas grandi ta durante e fin di siman di Carnaval, cu e tabata yama “Carnathon”, unda e ta transmiti pa oranan largo for di Lloyd G. Smith Boulevard di e unidad mobil, cu musica, banda, y entretenimento.

   Y como cu e tin amor grandi pa musica Soca, e tabata al tanto di historia di tur cos cu a pasa den Carnaval di Aruba, incluyendo cancionnan di Roadmarch, Calypso, (despues a bira Caiso & Soca Monarch) y tambe Tumba cu a participa.  Esey a impulsa Roberto pa bira conoci como un berdadero Enciclopedia Musical cu un memoria cu no ta faya.  Un berdadero baluarte cu tabata atrae oyentenan, sin importa na cual emisora e ta papiando. Hobennan awendia lo bisa cu Roberto Geerman ta sinonimo di Wikipedia pa Carnaval.  Tin hende cu ta hasta yame un “Tesoro Nacional” di loke el a haci pa Carnaval di Aruba.

   Roberto ta un persona cu tabata conoce hopi “inside information” di diferente Contest di Roadmarch di pasado, y tabata duna informacion rico di cantantenan, y for di hopi trempan caba e por dunabo cual ta su favoritonan pa gana e evento e anochi ey.

   E hecho cu Roberto por contabo detayes di cada participante, ta mustrabo con amplio su conocemento general ta.  Su cerebro ta manera un spons cu ta absorba tur informacion cu cay den su scochi, y ta keda corda esey cu tur luho y detaye.

   Roberto Geerman ademas di presenta na radio, a yega di fungi na numeroso ocasion como Maestro di Ceremonia riba escenario.  Y recien durante e Caminatanan di varios dia di Aruba Bank, tabata anima e participantenan tambe.

   Naracion di Mundial: Ademas di experticio di Carnaval, por a nota cu Roberto tabatin un pasion pa deporte.  Den pasado bo por a mira Weganan di Copa Mundial of di Eurocup solamente na TV.  Como cu tabatin un grupo grandi di hende cu no por ta na un TV pa mira esey, el a experimenta pa purba na bin cu transmision di Copa Mundial via radio.

   Y esey tabata un novum cu a wordo gusta inmediatamente na Aruba!  Cu Roberto narando e wega, bo tabata sinti comosifuera bo ta den Stadion.  Su analisis, y e forma di pone e oyente sinta na rand di stul, tabata loke a pone cu esaki a bira despues algo normal pa Aruba.   Ademas, danki na esey ta henter e isla a bin haya sa cu Roberto su team favorito pa Mundial, ta e seleccion di pais Croacia.

   E tabata haci su transmision for di diferente lugar na Aruba, y aki publico tabata bay sinta cune pa asina experiencia su voz en vivo.

   Su contribucion na Futbol di Aruba tambe tabata grandisimo!  El a cuminza wordo busca pa haci naracion di weganan di Division di Honor y su forma di adapta na condicionnan di teamnan, tabata fenomenal.

   Roberto tabata gusta come cuminda crioyo.  Trahando tras di microfono, e tabata ricibi regularmente treat di oyentenan cu ta trece un plato di pisca, of croket, pa e come den studio.  Ademas casi regularmente bo ta haye na El Gallo Rojo na San Nicolas, of tambe na Welcome Snack, y despues na Welcome Back Snack ta come un conchi grandi di Sopi di Mondongo.

   Yuda hopi musico y locutor: Algo cu hopi hende ta bay relata na bo, con Roberto a fungi un rol esencial pa a yuda nan drenta den mundo di radiodifusion.  E tabata duna guia, tabata mustra nan riba etica y protocol ora di papia na radio, e forma cu bo tin di complace oyentenan, y e reglanan basico di papia den mic, reglanan con pa bo prepara di antemano pa bo programa, y tambe con pa selecta genero di musica.

   Pero hasta musiconan local tabatin admiracion pa Roberto, specialmente e hecho cu e ta sostene nan ora cu cancionnan nobo wordo lanza.  Tambe den su programanan di radio, Roberto tabata gusta enfoca riba musica bailable, y ta pusha cada rato e produccionnan local den su horario di show.  Algo cu hopi musico local ta sumamente agradecido pe.

   Su ultimo conteo: Pa varios decada caba, Roberto Geerman a bira e locutor preferi pa scucha conteo di yegada di Aña Nobo.  No ta importa na cual emisora e ta sinta e anochi ey dilanti mic, su oyentenan ta buske pa asina nan tende ta conta for di 20, 19, 18, 17... te ora e yega 0 seconde y grita Bon Aña Nobo.

   Aunke e no tabata sinti su curpa bon, Diabierna anochi 31 di December 2021 e tabata atrobe na mic di Radio Galactica pa asina haci e conteo tradicional aki.  El a keda corda e oyentenan cu e no ta sinti su mes bon, pero e ta cumpli cu nan.  El a bisa tambe cu e lo stop pa 12:10 am, pa e bay cas.

   Sinembargo asina hopi oyente a cuminza yame na telefon pa dune bon aña, y el a keda mucho mas largo cu e 12:10 am cu el a anuncia cu e lo bay.

   Y esey tabata su ultimo conteo di Aña Nobo tambe.  Den e prome dos siman di Januari el a keda cu un malestar, y esaki a bira un tiki mas fuerte e fin di siman cu a pasa.  Ora di a bay pidi yudanza, decision a ser tuma pa e wordo hospitaliza.  El a cuminza haya problema cu rosea y a pone aparato pa observacion na dje.

   Diadomingo den dia el a hasta cuminza sinti su curpa mihor, y asina a comunica via Whatsapp cu diferente amigo y amiga pa saluda nan.  Pero esey a resulta di ta su ultimo mensahenan tambe.

   Den e anochi di Diadomingo pa Dialuna, su salud a empeora y mainta Docter a constata su morto.

   Na su yiunan, nietonan, rumannan, primonan, sobrinonan, famia, y tur su coleganan, amigonan locutor, y fanaticonan na Aruba, DIARIO y na nomber di gerencia Famia Mansur, ta expresa su mas profundo palabra di condolencia.  Cu Todopoderoso tuma Roberto den Su Reino pa e haya sosiego eterno.  Danki pa tur cos, Roberto!