ORANJESTAD (AAN) -- E mama di Luisangel Figueroa, Anahixa Flores, tambe a combersa cu DIARIO,
y a bisa cu e marcha tabata tambe pa recorda cu tres luna pasa su yiu a fayece, na un manera inespera y inexplicable te dia di awe. Y tambe pa e caso no keda drumi, pa autoridad no cere pero sigui dilanti cune. Nan tin entendi cu autoridadnan ta trahando riba e caso, y basicamente nan kier a recorda Luisangel na un bon manera.
Señora Flores kier a aclarea cu su persona a acerca autoridad dos biaha, y no cu autoridad a yame. Dos dia prome cu e marcha a tuma lugar el a wordo yama pa autoridad, pa motibo cu nan tabata un poco molesto door di e borchi y loke tabata bisa tocante e ministerio. Nan a puntre kico esaki ta y si e famia tabata sa cu esaki por trece un problema den e relacion entre nan y autoridad. Pero, concretamente, nan no a bise nada ainda tocante e caso; nan tin nan investigacion y nan sistema di traha. E señora a reitera cu su molester tabata cu nunca autoridad a yame, e ta esun cu a bay cerca nan. Unico biaha cu nan a yame ta pa sundr’e pa e borchi cu e mes a traha y cu tabata papia tocante e ministerio.
Señora Flores a acentua cu e no kier tin ningun problema cu ningun hende, ni cu e ministerio, ni recherche, ni tampoco cuestiona con nan ta traha. E dama a bisa cu unico cos cu e kier sa, ta kico a pasa cu su yiu, y un contesta. “Mi no ta kere cu, cu esey mi ta haciendo fout of un pica cune. Esey ta mi dolor, ni sikiera ta un molester, ta un dolor di sa cu mi yiu a muri, y cu te dia di awe mi no tin contesta. Un mall cu no tin camara, cu ningun hende a wak algo, un escenario totalmente straño; cu Luisangel a cay riba un piso, e no tin hopi fractura na su curpa, pero un golpi na su cabes y un custia rementa door di su reanimacion. Anto, con ta cu e por a cay di un piso asina halto y ningun hende por a wak nada”, señora Flores a remarca.
Un contesta ta tur loke, basicamente e famia ta pidi. El a agrega cu tambe e kier aclarea cu e no ta bay su so hospital, pa pidi un documento. “E Recherche a manda mi Hospital, pa e pidi e documento unda ta bisa kico tur nan a haci cu mi yiu, y cu ta mi derecho pa bay hospital pidi un rapport, Di con hospital ta nenga? Esey si mi no sa!”, señora Flores a subraya, y a señala cu tin cu bisa cu ta un ley, otronan ta bisa cu ta un acuerdo, pues e mes no sa. Pa conclui el a expresa cu pa dos luna e caso ta drumi te awo y nada a wordo haci.
,
