Conferencia Docente Ekipa ta duna sosten y hermentnan esencial na docentenan pa enfrenta retonan den klas

Jeanmiree van der Werf di EPB

ORANJESTAD (AAN) – Durante un entrevista na e Conferencia Docente Ekipa, señora Jeanmiree van der Werf di Educacion Profesional Basico (EPB) Oranjestad a comparti su perspectiva riba e desafionan cu maestronan ta enfrenta den klas y con eventonan manera e conferencia aki ta prepara nan miho pa e realidadnan actual den educacion. 

Segun señora Jeanmiree, e conferencianan no solamente ta fortifica e capacidad profesional di docentenan, pero tambe ta ofrece sosten emocional y hermentnan practico pa enfrenta situacionnan desafiante den klas. Maestronan ta haya oportunidad pa siña di otro, comparti experencia y desaroya habilidadnan esencial pa un proceso continuo tanto den nan crecemento profesional como den e aspecto emocional. 

Tin un Bureau Zorg pa tanto EPB Oranjestad como EPB San Nicolas, den cual ta inclui un Departamento di Docenten Coach. Esaki ta un structura clave pa yuda y guia docentenan den nan crecemento profesional, maneho di retonan, y bienestar emocional. 

E Conferencia Docente Ekipa ta un oportunidad pa docentenan y stakeholders den e campo di educacion pa reuni, siña di otro, y aplica experiencianan den nan propio ambiente escolar. “Nos ta haya oportunidad pa relaciona mas cu e docentenan di nos mesun scol pero tambe di otro scolnan. Y nos por duna docentenan consehonan mas dirigi riba nan necesidad di loke nan ta experiencia den klas”, señora Jeanmiree a expresa. 

Un di e punto principal cu señora Jeanmiree a destaca ta cu e retonan social den klas ta keda un di e obstaculonan mas grandi pa maestronan. Maestronan ya no ta bay scol solamente pa duna les. Nan ta wordo enfrenta mas y mas cu problema social, mal comportacion, y mal actitud durante les. E situacionnan aki ta pone presion y nan mester siña maneha e situacionnan cu empatia y habilidadnan adecua. 

Pa enfrenta e realidadnan den educacion awendia, maestronan mester desaroya habilidadnan pa maneha cambio. Educacion ta keda evoluciona constantemente. Ta importante pa docentenan keda actualisa cu informacion, pero tambe pa sigui desaroya nan mes cu habilidadnan cu por ta ainda no tur tin desaroya completamente. “E ta un ‘lifelong learning process’. Docentenan ta keda siña, tempo ta pasa, educacion ta keda cambia y e parti di maneho di cambio ta hopi importante pa docentenan”, Señora Jeanmiree a conclui.