Motor Diesel Generator DG-7 di Wärtsilä entrega oficialmente na WEB

ORANJESTAD (AAN): Dialuna tabata un dia importante, ora cu WEB Aruba NV y Wärtsilä Finland Oy a firma e asina yama ‘Final Completion Certificate’

di e Diesel Generator DG-7 nobo den e planta RECIP III.  Cu e firmamento aki, Wärtsilä formalmente a entrega e motor nobo na WEB.

   Ta trata aki di e reemplazo di e motor cu a sufri daño di candela na April 2024.  E ceremonia a tuma lugar na WEB den compania di diferente mandatario, partner di proyecto, empleado- y contratistanan.  Pa e ocasion aki a haci un donacion di 10.000 Florin na Fundacion Arubano pa Maneho di Facilidadnan Deportivo na beneficio di nan piscinanan.

   Durante su discurso, CEO di WEB Aruba Alfredo Koolman a gradici team di emergencia di WEB pa na momento di e candela den planta RECIP III aña pasa, a tuma accion rapido pa combati e candela. E timing di e candela e tempo ey no por a bini na un momento pio. Tawatin un aumento substancial den demanda di energia, debi na aumento di temperatura y turismo creciente. E incidente na e momento ey a acelera e buskeda pa capacidad di energia temporal adicional.

  E proyecto a rekeri un inversion di mas di 35 miyon florin, pa cual ainda WEB ta den discusion cu su compania di seguro. Den su discurso sr. Koolman a enfatisa cu WEB tin un cantidad hopi limita di incidentenan di candela, compara cu otro islanan bisiña desde cu a cuminsa uza motornan 19 aña pasa. WEB su operadornan y personal di mantencion ta certifica y ta e motibo entre otro pa e disponibilidad halto, facilidadnan bon manteni cu un housekeeping excelente.

   Pa por cumpli cu e demanda di energia di comunidad y turismo como industria nacional cu 2 miyon bishitante anualmente, WEB mester di facilidadnan solido manera esun di e standard aki y sigur no un unidad improvisa cu tur riesgo pa confiabilidad y consecuencianan debido. Consecuentemente e CEO a urgi e representantenan di e compania di seguro pa colabora den soluciona e claim cu tin un aña y mey andando.

   Un otro proyecto di capacidad firme andando ta e expansion di e mesun planta RECIP III cu 2 motor, programa pa ta operacional na augustus 2026. E capacidad aki ta hopi importante ora di desaroya proyectonan di energia renobabel. Desde cu tin mas claridad riba e trayecto pa energia renobabel (biento, solo y almacenamento di energia), e meta nacional ambicioso di 50% di energia renobabel pa 2030 ta factibel, e CEO di WEB ta opina.

   Tin hopi trabou pa haci ainda pero tin un bon spirito colectivo bou di stakeholders pa logra e meta nacional ambicioso aki. Un contribucion hopi bon ta e financiamento di Ministerio di Asuntonan Economico y Clima di Hulanda pa 2025 y e proximo añanan. Sr. Koolman a finalisa bisando cu financiamento di e transicion di energia incluyendo e proyectonan nesecario di capacidad firme manera esun aki, ta hopi crucial y tin su atencion completo. E tin confiansa completo cu e financiadornan tambe lo contribui na e obhetivo nacional hopi importante aki.

   Manera acostumbra, pa celebra proyectonan nobo, WEB a haci un donacion pa asina contribui na un comunidad sostenibel. E donacion a bay pa Fundacion Arubano pa Maneho di Facilidadnan Deportivo pa maneha Community Pool na San Nicolas y Piscina Olimpico Roly Bisslick na Savaneta.  Den e piscinanan aki centenares di mucha anualmente ta tuma nan les di landamento y varios organisacion di landamento ta train eynan diariamente. E piscinanan tin necesidad grandi di mantencion y WEB Aruba ta contento di por contribui, no solamente financieramente, pero tambe por medio di su experticio di mantencion di sistemanan y testmento di calidad di awa.