Ta momento pa Arbowet cuminza su proceso na Aruba

Segun medidador Anselmo Pontilius:

ORANJESTAD (AAN)—Den entrevista Mediador Anselmo Pontilius, en ocasion di un conferencia di trahadornan cu a tuma lugar Diamars, el a comenta na Matutino DIARIO cu ta momento pa Arbowet cuminza cana su proceso na Aruba. El menciona cu e Islanan di ex-Antiyas Hulandes, a cambia nan Codigo Civil mucho prome Aruba. Finalmente Aruba a cambi’e y a aprob’e den Parlamento, loke falta tene sesionnan informativo hunto cu Departamento di Labor, pa splica cada parti di loke e cambionan ta. E cambionan ta hopi.

“Nos por riesga bisa cu mas di 60-70% di e cantidad di trahado y doñonan di trabao no sa e contenido y p’esey tambe bo ta haya bo cu situacionnan cu ta induci para te na Corte. Loke nos tur tin  cu haci ta percura pa e proceso di keda informa, educa, esey no t’ey na e momentonan aki.

“Mi ta kere cu ta na su lugar, un biaha mas, un bez cu bo tin Departamento di Labor na caminda pa bisa ‘ok, mi tin hendenan prepara pa bay haci esaki’, (pasobra esey no ta describi den e tarea di Departamento di Labor), pa hiba un proceso pa bay pia di trabao hunto cu sindicatonan y otro instancianan, pa educa, cu ta ‘control na pia di trabao’. Control na pia di trabao cu ta mustra responsabilidad di e trahado y responsabilidad di e doño di trabao tambe”, Anselmo Pontilius a remarca.

Pontilius a señala cu asunto aki no solamente mester bin bek na mesa, pasobra bo tin e Codigo Civil cu tey caba. “Ami ta kere cu si lo bin cambionan loke tin cu haci ta, conhuntamente cu oficina di abogadonan cu ta representa doñonan di trabao, y mas cu nunca duna sesion, particularmente, e Departamento di Recurso Humano di e companianan, pero tambe e dirigentenan y e trahador den comun, general. Nos no mester tin berguenza di admiti cu tin falta grandi di conocemento”, Anselmo Pontilius a señala. El a agrega cu FTA, e lunanan aki riba su pagina di facebook, por ehemplo, trata kico ta cesantia, kico ta ley di vacancy, entre otro.