Concientizacion riba cambio di clima ta importante

ArtisA e aña aki ta organiza ‘Climate Meets Fashion’

ORANJESTAD (AAN): Durante un conferencia di prensa Director di ArtisA Tito Bolivar a indica cu esaki ta bay ta di 5 aña cu ArtisA ta organiza eventonan.

El a para keto un rato y a honra memoria di Alex Nieuwmeyer kende semper a sostene e proyectonan.

“E tabata un persona kende a sa di compronde e balor artistico di arte y tambe e balor di e proyectonan cu nos ta presenta na comunidad”, segun Bolivar.

El a sigui menciona cu awor ta lanza ‘Art Fashion’, cu e aña aki ta bay yama ‘Climate Meets Fashion’.

“Pa esun cu conoce nos boso sa cu tur aña nos ta bin cu un fashion show cu ta papia di diferente cos”.

Nos tabata tin por ehempel e aña di ‘Speak Up y Breaking The Silence y e aña aki nos kier concientiza pueblo riba e problematica di ‘Climate Change’, esta cambio di clima.

Nos kier pa tur hende actua aworaki, segun Bolivar.

El a splica cu pesey ArtisA e aña aki tin un acuerdo cu Directie Natuur en Milieu, unda cu ta bay trece diferente proyecto dilanti, pa asina hunto crea un campaña di concientizacion riba tur e problematicanan cu tin, di cual uno ta Climate Change.