Sharienne Winterdaal:
ORANJESTAD (AAN): Den un entrevista cu Shariënne Winterdaal, el a splica cu nan di Hospice Atardi ta extende un invitation na pueblo di Aruba pa participa na e 2nd edition di “E Ultimo Miya, Hunto” Memorial Walk & Run.
E evento ta tuma luga anualmente riba e di dos diasabra di October, pues exactamente dia 10 di October 2026, den cuadro di World Hospice & Palliative Care Day, cu ta pone atencion riba cuido compasivo pa hende den nan ultimo fase di bida.
“E Ultimo Miya, Hunto” ta un memorial walk & run di 5 km, unda bo por cana of core. Cada paso ta un homenahe: (*) Pa honra un ser keri. (*) Pa sostene un hende den cuido paliativo. (*) Pa un hende cu no por participa su mes pa motibo di malesa, salud of otro circunstancia.
E evento no ta un sponsorloop ni un competencia. E ta un expresion publico di amor, reflexion y compassion - un comunidad cu ta sostene otro, asta den tristeza.
Tur hende ta welcome: famia y amigonan, atletanan y sportgroepen, of simplemente cualkier persona cu kier mustra solidaridad. Participantenan por ricibi un lint y BIB, unda nan por pone e nomber di un ser keri of un mensaje personal.
E meta ta habri mas dialogo na Aruba tocante morto, cuido paliativo y un fin di bida digno, y crea mas consciencia pa cuido humano, profesional y compasivo na e ultimo fase di bida.
Falta aproximadamente 1 siman pa e deadline di registration. Cupo ta limita y ta yenando!
Sea cu bo ta cana pa un ser keri of pa sostene nos causa, bo presencia ta agrega significado. Laga nos camina hunto pa duna atencion na e cuido cu tur hende merece na fin di bida.
Ruta di e evento: E Walk & Run lo start y finaliza patras di Hospice Atardi. Na salida ta bay direccion caminda grandi, pasa dilanti Hospice riba Cura Cabai. Na crusada di Wendy’s ta bai direccion Brazil y sigui te na final. Aki ta bay man robez riba Caya Bernadina Growell-Kock, sigi te na Cruzada-Y di Misa Cristo Rey.
Aki ta bai direcicon Mabon, e di 3 caminda na bo man robes ta drenta caya di Noord Cura Cabai sigui pa Savaneta, na final di caya ta subi caminda grandi di Cura Cabai y ta sigi te supermercado Mui-Mui. Aki ta drenta caya na man robes y sigi riba caminda bek na cuminsamento di e caminata, parti patras di e cas, Hospice Atardi.
