Awe ta firma convenio cu Aruba pa adictonan cronico haya tratamento na Corsou

Señora Ijolène Constancia-Klaber di Clinica Brasami di Corsou

ORANJESTAD (AAN): Representantenan di Verslavingskliniek Brasami di Corsou ta di bishita na Aruba primeramente pa firma un convenio entre Aruba y e clinica Brasami pa asina clientenan di adiccion cronico di Aruba bay Corsou pa tratamento. Den varios session, nan a splica stakeholdernan di Aruba tocante tur protocol y na ki momento por manda un cliente na clinica Brasami pa tratamento. E contracto ta wordo firma awe Diaranson 5 di Augustus 2026.

   Señora Ijolène Constancia-Klaber di e clinica Brasami a duna di conoce cu nan a brinda informacion na diferente stakeholder di Aruba encuanto di e clinica y cua cliente por ser manda pa e clinica pa e prome fase di tratamento. El a splica cu e programa no ta pa clientenan cu ta den e prome fasenan di adiccion sino pa esnan mas cronico, mas complica den adiccion. Ta trata di personanan kende nan salud ya a bay atras, famia y trabao tambe a bay atras.

   “Ta importante pa canalisa e proceso pasobra ta importante pa e proceso di e cliente bay smooth, pa e cliente yega Corsou, tuma tratamento y bin bek Aruba y sigui cu e cuido na Aruba”, el a enfatisa. 

   El a menciona cu e clientenan no por drenta e clinica na un manera boluntario pero mester ta abase di curatela of un ‘justitiële titel’ na unda hues mester duna un ordo pa indica cu e cliente mester tratamento na Verslavingskliniek Brasami.

   El a menciona cu na Corsou e clientenan ta ricibi e base di recuperacion, nan ta ser desintoxica, ta haya structura y tratamento. Esaki ta e prome fase. E di dos fase di e tratamento di resocialisacion ta sosode na Aruba mes.