Companianan Estatal a reuni cu San Nicolas Business Association y Aliansa

Utilities Aruba NV

ORANJESTAD (AAN):  Den cuadro di transparencia a tuma luga un reunion entre companianan estatal; WEB, Elmar y Utilities Aruba cu San Nicolas Business Association (SNBA) y Aliansa.

E reunion a wordo solicita na Utilities Aruba pa asina e companianan estatal, duna mas informacion riba e expansion di e parke di molina na Rincon.  E parke di Molina lo reduci e costo di electricidad pero na mes momento ta un necesidad pa combati cambio climatico of “Global Warming”, calentacion global.

   Utilities Aruba a invita presidente di hunta di comisario di WEB, Elmar y Utilities Aruba pa tambe ta presente den e reunion cu SNBA.

   Presente na e reunion di parti di SNBA y Aliansa tabata, Sr. S. Richardson, Dr. J. Rajnherc, Sr. T. Bolivar, Sra. D. Quant y Sr. E. de Freitas. Director di Utilities sr. Anthony Rojer, director di Elmar sr. Anthony Irausquin cu su experto Jonathan Van Der Linden, y presidentenan di e Huntanan di Comisario di Elmar, WEB y Utilities tabata presente den e reunion. 

   Durante e reunion a splica SNBA y Aliansa riba e necesidad di un di dos parke di molina pa por garantisa un bon tarifa, confiabilidad y sostenibilidad pa cu coriente den un medio ambiente mas sano pa nos comunidad. Como grupo di utilidad na Aruba, Web, Elmar y Utilities a yega na un “Expression of Interest (EOI)”, na unda lo invita expertonan den mundo energetico pa por expresa nan interes pa haci oferta di energia. E proceso aki lo duna oportunidad na diferente interesadonan pa competi cu nan mihor prijs cual ta na beneficio di pais Aruba.

   Aparte di esaki, Elmar tambe a informa SNBA y aliadonan riba e desaroyonan andando actualmente pa cu San Nicolas en general na unda nan lo tuma e luznan cu ta ilumina e cayanan di San Nicolas bou di nan encargo, garantisando iluminacion den e cayanan di San Nicolas.

   Sr. Anthony Rojer a expresa cu e reunion tabata uno positivo y den bon ambiente y cu ta importante pa den futuro organisa mas di e reunionnan aki pa asina den cuadro di transparencia tur entidad ta bon informa riba cualkier desaroyo.