Secretario di Estado ta positivo cu Aruba y Hulanda lo sali afo di e diferencia

Ministro Plenipotenciario Ady Thijsen:

ORANJESTAD (AAN): Informe di Den Haag, ta indica cu Minister Plenipotenciario Ady Thijsen a elabora riba algun punto importante cu a worde trata durante di e reunion di Conseho di Ministronan di Reino (RMR) cu a tuma luga recientemente.

   E temanan cu a trata ta acerca di decisionnan cu a tuma den cuadro di Aruba su deficit di 2022 y con lo sigui padilanti. Minister Thijsen a indica cu e tabata un bon reunion.

    Reunion Conseho di Reino:  Un di e puntonan cu a trata tabata e deficit di 2022 unda cu CAft a duna su “aanbeveling” / recomendacion y Secretario di Estado Alexandra van Huffelen a pidi pa wanta esaki. Motibo di esaki ta, pasobra tin un diferencia entre con Aruba y Hulanda ta yega na e sumanan (cua manera di calcula ta uza). Staatssecretaris van Huffelen ta positivo cu Aruba y Hulanda lo sali afo.

   Minister Thijsen a indica cu durante e reunion nan a reconoce cu tin un diferencia, y pues a tuma e decision pa wak esaki miho un biaha mas pa asina no keda den e impase.

   Un otro punto cu a worde treci dilanti ta cu e pandemia ta bayendo pero cu mester por tin espacio den caso cu e pandemia lanta cabes of si bin desaster natural.

   Den cuadro di esaki nan a trece den nan puntonan dilanti cu nan ta sali for di e punto di bista cu tur cos ta bay sigui bon y e pandemia no ta bin back. Consecuentemente pa 2023 lo aplica e normanan normal back.

   Minister Thijsen a sigui splica cu den e LAft di Aruba y RFT di Curaçao y Sint Maarten, ta poni articulonan (articulo 23 pa Aruba) cu por desvia a base di e articulonan aki den caso cu bin un ‘ramp’. Considerando esaki Minister Thijsen a bisa cu el a enfatisa cu semper mester tene esaki na cuenta cu por haci uzo di e articulonan aki pasobra no por premira locual lo pasa den futuro. Pues ta spera cu di berdad tur cos ta bay bon y cu nada mas manera e pandemia tuma luga, pero cu ta reconoce cu tin e espacio pa uza e articulo menciona, den caso cu mester, cual nan a bay di acuerdo cu ne.