ORANJESTAD (AAN) Rulienne Arends di Fundacion Anti Droga Aruba a indica cu den October lo tin e famoso Siman di Cinta Cora.
Esaki ta un costumber pa 25 aña caba. E siman di Cinta Cora a cuminza hopi aña pasa door di famianan di un agente di DEA (na Mexico), cu tabata investiga narcotrafico, pero a worde mata, y su famia kier a bin cu algo pa recorda e persona aki, pa tur e esfuerzo y lucha contra adiccion. E ora ey su famia a cuminza uza loke ta e Cinta Cora y tur aña esaki a cuminza crece y bira mas grandi.
FADA, naturalmente a join e evento aki, y e team completo di diferente parti di mundo, y Aruba tambe tin su dia di Cinta Cora. Tambe pa di 10 aña lo tin e siman di “bisti na locura” y mescos cu tur aña esnan tras di e evento aki, ta scoge un lema unda diferente scol ta participa y nan ta saca e lema ganador. E aña aki, e lema ta “celebrate life, leave drug free”. Esaki a cay hopi bon pa FADA mirando cu nan ta celebrando e Siman di Cinta Cora y Bisti na Locura, pa diez aña caba.
Na Aruba tambe scolnan ta forma parti di e actividad y conforme añanan a pasa tin famianan y companianan cu a bin acerca, y algun compania ta duna sosten. E aña di Covid FADA no tabata hopi sigur con e a bay cana, pero a resulta un aña tambe hopi grandi y hopi famia a participa, hasta nan mascotanan ta forma parti di esaki, Rulienne a comenta. El a subraya cu FADA ta hopi contento pasobra no ta solamente scolnan ta forma parti, pero e comunidad completo.
