Como 68% di pueblo ta contento cu Industria di Turismo

ATA a pone resultado di encuesta habri pa publico

• Ta reconoce un cambio di sentimento di turismo mundialmente
• Como 75% cu ta traha den horeca ta contento 

ORANJESTAD (AAN): Aruba Tourism Authority (A.T.A.) ta continua cu e compromiso pa midi y compronde e sentimento di e comunidad local encuanto turismo. E prome coleccion di data a tuma lugar na 2018 durante e periodo di celebracion di Dia di Himno y Bandera cu bishita na varios Centro di Bario rond di e isla cu e meta pa ripiti e investigacion aki cada dos aña.

   Den 2020, e investigacion aki no por a worde completa pa motibo di e pandemia di COVID-19. Despues di e pandemia, A.T.A. a propone pa re-evalua e sentimento di e comunidad pa asina por identifica cualkier cambio debi na e pandemia. Na mei 2022, cu asistencia di diferente studiante di Universidad di Aruba, A.T.A. a percura pa incorpora un metodo amplio pa colecta feedback, usando tanto encuesta online como tambe entrevistando miembronan di nos comunidad.

   Den 2024, data a worde colecta na comienzo di Maart, riba fechanan di 1, 2, y 17 riba Plaza Betico Croes durante e Evento Cultural, y riba nos dia Nacional di Himno y Bandera 18 di maart na varios Centro di Bario di entre otro; San Nicolaas, Savaneta, Brazil, Santa Cruz, Piedra Plat, como tambe na Royal Aruba Aloe y Museo Arqueologico.

Un encuesta tabata disponibel via Qualtrics utilisando un link di URL y un codigo QR, cu a worde comparti a traves di medionan di prensa local, plataformanan di red social di Oficina di Turismo (A.T.A.), y promovi di diferente manera. Alavez, ta di menciona cu a acerca y a ricibi participacion di trahadornan na diferente negoshinan local, y studiantenan di Universidad di Aruba y Colegio E.P.I. Ultimo dia cu participantenan por a yena e encuesta tabata dia 15 di april 2024.

   Den 2024, A.T.A. a dicidi di haci un evaluacion(“review”) independiente di e metodologia usa pa e Local Sentiment Survey. E evaluacion aki a worde haci door di MGM Source y a enfoca riba diferente aspecto manera e metodologia aplica, preguntanan di e encuesta, ‘sample sizing’ y ‘target market’, e proceso di e coleccion di e encuestanan, ‘data entry process’, y ‘quality of collected results, confidence level y effectiveness’. Tambe A.T.A. a introduci un ‘thematic analysis’ pa por a segmenta tur e comentarionan colecta den topiconan. A.T.A. a inverti tempo den esaki y awor cu a completa e aspecto aki, ta pasa na comparti e resultadonan.

   A colecta un total di 3,583 encuesta, di cual 2,053 encuesta tabata online y 1,530 tabata encuestanan ‘face-to-face’. Despues di a check pa erornan (por ehempel encuestanan no completo), a establece e cantidad final na 2,592 encuesta.

   Basa riba e poblacion local di 107,566 (Central Bureau di Estadistica 2023), por conclui cu e total di encuestanan corectamente colecta ta carga  un nivel di confianza di 95% y un ‘margin of error’ di 5%.

   Segun e resultadonan revisa di MGM Source (e consultantenan cu e haci e revision) e cantidad di encuesta colecta (2,592) pa e encuesta di ‘Local Sentiment’ tin un nivel di confianza di 99% y un ‘margin of error’ di 2.5% cu ta sobrepasa e minimo necesario.

   Actualmente, A.T.A. ta tumando pasonan proactivo pa redefini e modelo di turismo a traves di ‘Responsible Tourism’ y finalmente ‘Regenerative Tourism’. Accionnan lo dirigi nan mes riba esaki cu aspiracion pa Aruba avansa y posiciona su mes como lider den practica di turismo responsabel y sostenibel pa generacionan cu ta sigui. Varios cambio a worde comparti recientemente y lo sigui haci esfuerso pa sigui comparti esakinan.

   Ta di menciona cu A.T.A. ta orguyoso di e ehecucion positivo y constante di e sector di turismo. Aruba ta continua di ta un di e mihor destinacion den region Caribe cu un demanda y posicionamento halto. Aunke cu esaki ta e caso, ta di reconoce cu nos destinacion ta na un crusada. Ta importante pa reconoce un cambio di sentimento di turismo mundialmente. E impacto negativo excesivo di turismo riba e comunidad anfitrion y ambiente natural ta real, y na Aruba nos no ta inmune na e ola di sentimento mundial aki.

   Como 68% ta contento cu Turismo: E resultado a indica cu un number significante di participantenan di e encuesta ta reconoce cu turismo ta un industria clave y e motor di e economia di Aruba.

   Como 68% di e poblacion di participantenan di e encuesta a expresa di ta contento cu e industria di turismo.

   Bao di esnan cu ta traha directamente den e sector di hospitalidad, esaki ta 75%, es decir e cantidad cu ta contento cu e industria.

   Den un escala di 1 pa 5, 68% di e participantenan di e encuesta a ‘rate’ turismo cu un punto di 4 (positivo) pa 5 (extremadamente positivo). Den total, esaki ta refleha un impacto generalmente faborabel cu un averahe di 3.9 punto. Na otro banda, entre e 32% di e participante cu a ‘rate’ extremadamente negativo pa neutral, 19% a opta pa duna un comentario adicional.

   Esnan cu kier download e resultado di encuesta, por haya e documento den formato PDF via e website aki:

www.bit.ly/turista24

   A percura pa segmenta tur comentario den topico principal. E topiconan mas menciona tabata; e volumen di turista riba e isla, repercusion economico (relata na labor, prijs di vivienda, e ganashi cu no ta yega na e pueblo, etc.), envolvimento di e comunidad limita cu un enfoke riba turista, e necesidad pa mehora e infrastructura, y consideracion pa cu nos medio ambiente/naturalesa.

Un otro pregunta cu a worde haci na e participantenan ta pa duna un indicacion di nan preocupacionan principal.

   E participantenan a expresa varios punto di preocupacion, cu ta inclui: acceso na vivienda pagabel, presion riba e infrastructura, insuficiente beneficio directo di e entrada cu turismo ta genera, y daño na e medio ambiente/naturalesa.

   Ta di menciona cu a colecta feedback for di un grupo di edad varia cu ta ser categoriza pa generacion di Gen Z (personanan cu un edad di 18 pa 27 aña cu un participacion di 12%) Millenials (personanan cu un edad di 28 pa 43 aña cu un participacion di 35%), Gen X (personanan cu un edad di 44 pa 59 aña cu un participacion di 35%), y generacion Boomers (personanan cu un edad di 60 aña bay ariba cu un participacion di 18%).

   E reparticion a base di districto ta indica cu 32% di e participantenan a bini for di districto di Paradera/Santa Cruz, 27% for di e districto di Noord/Tanki Leendert, 22% for di Oranjestad, y 19% for di Savaneta/San Nicolas. Un notable 82% di e participantenan ta emplea na e momento cu a completa e encuesta, y 70% ta den e rango di edad di 28 pa 59 aña.

   Aproximadamente 68% di e participantenan ta un mayor cu un average di dos yiu. Nivel di educacion entre e participantenan ta varia, cu 47% tin un Bachelor’s Degree of mas halto.

   Cu puntonan di estudio resalta, nos ta invita pa bishita www.ata.aw/knowledge-base pa lesa e resultado di e estudio di ‘Local Sentiment’. 

   A.T.A. ta gradici e comunidad local, companianan local, y studiantenan cu a forma parti di encuesta aki. Ta subraya atrobe cu A.T.A. a cuminsa anuncia ahustacion den maneho caba, pero cu tambe esfuerzo pa entre otro maheha sobre turismo, ta un responsabilidad colectivo y no di A.T.A. so.