Ir. Edwin Jacobs, director SVb:
ORANJESTAD (AAN) Den entrevista cu DIARIO, Director di SVb, Ir. Edwin Jacobs, a bisa cu pensioen di biehes nunca ta baha. Pa ley subi so, e ta keda subi, sea door di inflacion of pa un aumento mas grandi cu inflacion, y no tin ningun decision di gobierno pa baha esaki.
No obstante, por tin caso unda cu un pensionado su pension por baha, pero esaki tin biaha ta debi cu e circumstancianan personal di e pensionado a cambia, y e no a notifica SVb tocante esey.
“Anto SVb, den un control rutinario, ta bin constata a ricibi un pensioen cu no tabata tin derecho riba dje, an to SVb ta cobra esaki back. Of, a ricibi reparatie toeslag cu no tin derecho riba dje, cu SVb tin cu cobra esaki bek”, Jacobs a splica.
Como ehemplo, el a splica cu un persona cu ta casa cu un persona cu ta mas jong cu ne y ta yegando edad di pensioen, e lo haya un pensioen pa pareha semper y cuando nan ta casa y ta biba den mesun adres.
“Awo, den tempo kizas e persona aki a divorcia sin cu e otro yega edad di pensioen, anto e no a notifica nos. Anto, ora nos ta haci nos control rutinario via e archivonan di censo, nos ta bin constata cu e persona aki a divorcia aña pasa. E ta nifica e ora ey cu ora bo divorcia bo no tin derecho mas riba un pensioen pa pareha, pero bo tin derecho na un pensioen pa soltero; loke ta nifica cu pa un periodo bo a cobra un suma di pensioen cu no tabata tin derecho riba dje.
Anto na e momento ey nos ta cobra esaki back, pero nos ta notifica e pensionado si. Pues, cu un suma di pensioen por baha por, pero solamente ora tin un situacion personal cu a cambia y bo no a notifica nos”, Edwin Jacobs a señala.
Otro situacion cu por sosode ta cu e persona ta biba na Aruba anto el a dicidi di bay biba afo pero no ta notifica SVb. “Ora bo ta biba na Aruba, bo tin derecho riba e reparatie toeslag. Ora SVb haci su control y ta ripara cu bo no ta bibando na Aruba, ta nifica cu pa tur e lunanan cu bo a cobra reparatie toelag bo tin cu paga nan back. Anto e momento ey nos ta bay cort’e riba bo pensioen. Esakinan ta e unico formanan cu bo pensioen por baha”, Ir. Jacobs a subraya.
