Director Herrick Henriquez:
- Tene cuenta cu Aduana ta bay cu vacacion
- Corda riba efecto di welga na puertonan na Merca
ORANJESTAD (AAN) Otro aspecto cu Director di ATIA, Herrick Henriquez a comenta den entrevista cu DIARIO, cu mester wak, y cu tur aña, tur December, nan ta topa cu e situacion aki, ta ora Aduana bay cu vacacion.
“Pues nos ta puntra tur comerciante pa por fabor haci boso pedidonan na ora, pa tur cos ta na Aruba, pa no bin efecto atrobe, entre Pasco cu Aña Nobo cu no tin producto of mercancia na Aruba”, Henriquez a señala.
El a indica cu ATIA a contacta Aduana caba, y nan ta den contacto cu su director ken a bisa nan cu si e tin dos pa tres dia cu nan ta habri entre Pasco cu Aña Nobo, dia 27 cu 28 por ta mitad dia y dia 30 tambe, cu ta un dialuna, ta suppose cu no mester tin e situacion ey.
“Pero semper tin e logistica cu hende ta tuma liber, of hende ta malo cu AO pa fin di aña, anto pa nos no pasa den esey atrobe, pa tuma bon nota y haci e pedidonan na ora. Y tambe un hecho cu ta andando awo, e welganan na Merca den e puertonan cu nos ta uza, esey por tin un efecto tambe riba mercancia cu mester sali for di Merca”, Herrick Henriquez, director di ATA a comenta, y a indica cu ATIA ta keda monitorea e situacion.
