Como 1.000 persona a bay busca trabao na Job Fair di Windcreek Hospitality

ORANJESTAD (AAN): Diego Lemasson kende ta Director F&B pa Windcreek Hospitality, a mustra cu nan a keda contento cu e Job Fair cu nan a tene den siman cu a caba aki

, na Playa.

   Den Renaissance Conference Center, nan a tene dos dia di Job Fair.  Segun Lemasson, e tabata dos dia cu hopi reaccion di parti pueblo di Aruba.

   “Nos a haya bon reaccion di publico,” e director di Food & Beverage a indica den un entrevista cu DIARIO.  E prome dia tabata Diahuebs.

   Riba Diahuebs nan a haya 600 persona mas o menos cu a bay busca trabao.  Riba Diabierna nan a calcula cu esaki lo ta como 400 persona.

   E personanan cu a bay aplica, a presenta nan mes y duna un entrevista chikito tambe mesora.

   Diego Lemasson a splica cu Windcreek Hospitality tin como 50 puesto di trabao habri, y mayoria di e Departamento ta reclutando.  Tin hopi necesidad pa trabao den Food & Beverage, den Kitchen, Service, Housekeeping, Frontdesk, Spa, y bastante den Casino.

    El a nota cu den e Jobfair di e 2 dianan aki, mayoria di hende cu a bay aplica pa trabao tabata buscando un trabao den Casino.

   Tambe tabatin hopi persona cu a acudi buscando pa haya un puesto den Housekeeping.  Esey tambe tabata hopi notable den e dos dianan aki di JobFair.

   Lemasson a splica cu nan ta contento di haya asina hopi reaccion pa Housekeeping, como cu nan ta posicionnan clave pa cu e operacion di Hotel.

   Den e dianan aki, nan ta optimista cu nan lo bay yena mayoria di puesto, pasobra e personanan cu a presenta tabata hopi bon prepara cu yen motivacion.