ORANJESTAD (AAN) – Minister Presidente Evelyn Wever-Croes a anuncia e cambionan cu ta bay tuma lugar, entrante Dialuna 26 di April, den e cuadro di flexibilizacion di
medidanan pa preveni contagio di Covid-19 den nos poblacion.
Maneho di Covid entrante Dialuna 26 di April:
“Orario di ciere di establecimentonan cu aworaki ta 9’or ta bay bira 10 or. E ta hala cu un ora mas leu.
Toque de queda cu awo ta 10 or ta hala cu un ora y e ta bira 11’or.
Pa loke ta trata e Gebiedsverbod, e prohibicion cu bo por ta na lama, den parkinglot, of lugarnan publico cu tabata 7’or e ta bira 7.30.
Cu e gymnan tambe tabata tin combersacion y palabracion haci, y nan ta habri bek Dialuna 26 di April, segun protocolnan stricto.
Tambe basa riba varios peticion cu a wordo haci ta permiti atrobe Drive-By of Drive-Thru. Nos a mira cu esaki ta pasa hopi, den caso di cumpleaño y nos a stop’e dia 1 di April, ora nos tabata na 740 caso activo. Aworaki ta e momento cu nos por flexibilisa y permiti esaki atrobe”, Minister Presidente a subraya.
E dignatario a splica cu gobierno a yega na e cambionan aki despues cu tabata tin bon reunionnan cu e gremionan di e diferente areanan aki. Minister di Economia hunto cu e Gremio Comercial y Crisis Team a sinta delibera.
E Gremio Comercial y Crisis Team ta sinta hunto tur siman pa sigui evalua e pasonan y wak con nan por yuda gobierno pa yega na e meta di yega na 85% di e poblacion vacuna pa mas of menos mitad di Mei.
E mandatario a agrega cu tambe Minister di Salud a reuni cu Crisis Team y e Asociacion cu ta representa e doñonan di Gymnan y a yega na bon palabracion con esakinan por habri bek Dialuna otro siman.
