ORANJESTAD (AAN) – Den conferencia di prensa di actualizacion di e situacion di Covid-19 na Aruba, Minister Presidente, Evelyn Wever-Croes, a indica cu mirando e cifranan di
e ultimo dianan, te cu 23 di April tabata tin 350 caso activo, cu ta halto ainda, pero si compare cu e situacion di dia 1 di April, e tabata 704 caso activo.
Kiermen, di 1 pa 22 di April a logra baha e cantidad di casonan activo di 704 pa 350. “Ainda nos tin un average di 36 caso nobo pa dia. Kiermen, e riesgo tey. E peligro tey ainda, sinembargo, nos ta bayendo den bon direccion”, Minister Presidente a señala.
Refiriendo na e situacion na Hospital, e mandatario a informa cu te ayera tabata tin 39 persona interna door di Covid-19, di cual 15 den ICU. Lamentablemente, e cifranan tambe ta indica cu 95 persona a fayece, cu tabata tin Covid na momento di e deceso.
Un biaha mas e dignatario a expresa palabra di condolencia y forza pa e famianan di e fayecidonan y tambe hopi forza pa esnan cu ta luchando, di un of otro manera, contra e virus aki.
Minister Presidente a menciona cu no ta solamente cu e casonan positivo a baha na mitad desde 1 di April, ta loke ta mira na momento di tuma un decision pa flexibiliza e medidanan. Tambe gobierno ta mira e situacion di e vacuna.
El a elogia e sistema con comunidad ta wordo vacuna. Te cu Diahuebs 22 tabata tin un total di 45 mil persona cu a vacuna, cu ta mas of menos igual na 54% di nos poblacion a vacuna. Si reparti e grupo aki den esnan bao di 60 aña, e ta mas of menos 46.5% pues no a yega mitad ainda.
Si coi e grupo di 60 plus 72% ta vacuna. Tampoco a yega ainda unda kier yega, pero e ta bayendo den bon direccion, e dignatario a subraya. Hospital su situacion ta cu un poco menos presion, y e vacunacion ta bayendo bon, e ora ey por cuminza flexibilisa.
