Comision di Turismo a trata e rapport anual di ATA pa 2024

Parlamentario Jennifer Arends-Reyes:

ORANJESTAD (AAN) Como president di e Comision di Turismo di Parlamento di Aruba, Parlamentario Jennifer Arends-Reyes a manifesta na DIARIO su aprecio y felicita e ekipo di Aruba Tourism Authority (ATA) pa un 2024 exitoso, den un contexto di transicion importante pa nos industria turistico.

   E siman aki e comision a reuni cu directiva di ATA pa pasa door di e Rapport Anual 2024, haci pregunta y dialoga riba su contenido. Un oportunidad cu sigur Arends-Reyes y coleganan a tuma pa brinda nan aporte constructivo.

   Segun e ultimo rapport anual di ATA, Aruba a logra un aumento di 13% den bishita di turista cu keda, elevando e cifra total na mas di 1.4 miyon, e cifra mas halto desde 2011. Pero mas importante ainda ta e enfoke renoba riba sosten e turismo den harmonia cu nos medio ambiente, comunidad y economia.

Arends-Reyes a destaca cu mientras cu turismo ta keda e motor principal di nos economia, e preocupacion pa “overtourism” ta subi den comunidad. “E echo cu 68% di e encuesta local ta sigui satisfecho cu turismo ta positivo, pero nos no por ignora cu esey tabata 78% den 2018. Nos comunidad ta wak e necesidad pa mas balans y sostenibilidad,” el a indica.

   ATA a tuma un paso esencial cu e desaroyo di e Multi-Annual Corporate Strategy (MACS) 2025-2035, cu ta delinea un bista largo pa un turismo regenerativo. "Nos no kier solamente un turismo cu ta responsabel, nos kier un cu ta duna bek mas cu loke e ta tuma – un turismo cu ta lanta nos naturaleza, cultura y bienestar social,” segun Arends-Reyes.

  A.T.A. a sigui trahando riba manera di midi movecion di bishitantenan y distribui e fluho pa evita presion innecesario riba nos atraccionnan turistico. Sensor nobo a wordo instala na luganan strategico, y e informacion ta yuda pa mehora maneho y experiencia pa e turista, mientras cu e carga riba e isla ta keda controla.

   Ademas, e president di e comision di turismo a enfatisa cu un modelo di turismo High-Value, Low-Impact ta e unico manera pa preserva Aruba pa generacion futuro. “Turismo cu calidad, no solamente cantidad. Nos pueblo mester sinti cu e turismo ta yega tur hende, sin compromete nos dushi isla,” Arends-Reyes a conclui.

   E comision parlamentario lo sigui monitor e implementacion di e strategia nobo y ta disponibel pa traha man na man cu ministerio di turismo, ATA y sector priva pa un producto Aruba cu ta realmente sostenibel.