Comerciante y persona di haute couture Nena Ponson a fayece

Tambe un gran poeta

ORANJESTAD (AAN): E ta un di e caranan cu semper tabata saluda publico ora tabata bishita e establecimento di Manchito’s den Fergusonstraat cu awor ta Avenida Milio Croes.  Un tienda di renombre, di paña elegante pa e anochinan special di gala, y e mihor bachi y tuxedo cu tabata wordo ofreci na Aruba, y maneha e tempo ey pa Herman E. Ponson conoci como ‘Manchito’, hunto cu su casa Nena Ponson.

   Fuera di esey, Nena Ponson tabata dedica su mes na cosemento cu ta ser considera ‘haute couture’, y a yega di confecciona hopi bisti di bruid, bruidmeisjes, di mucha muhernan cu tabata bay ricibi Prome Santa Comunion, y tur esaki cu acabado fenomenal.

   Pa e conocemento aki, tur cliente cu drenta Manchito’s tabata haya consehonan balioso di Nena cu tabata interesa di algo pa bisti pa bay un fiesta.  Tabata ser bisa cu e dedenan di Nena tabata haci magia riba tur tela cu e haya su dilanti pa asina transforma nan den bistirnan elegante di gala.

   E tempo aya, Carnaval di Aruba tabata conoce eleccion di reina unda e candidatanan ta subi escenario cu trahenan elegante y fini traha, y aki tambe Nena Ponson a bira sinonimo di prepara candidata di e forma ey.  Y su amor pa participa den Paradanan di Carnaval tambe tabata algo di aprecia semper.

   Ademas di esaki, e otro pasion cu a haci Nena bira un persona hopi conoci riba Aruba, ta cu e tin forma pa haci magia cu palabranan, y tabata crea poema cu tabata haya admiracion.  Ademas di a bira un gran poeta pa cualkier ocasion, e tabatin un dominio completo riba su forma unico pa declama e poemanan aki.  Un forma cu e ta keda cautiva e atencion di publico, usando expresion y body-language pa asina capta atencion di esnan cu ta scuchando, pa asina haya un interpretacion mas profundo di e mensahe cu e ta mandando.  Un admiracion di hopi hende riba su habilidad natural aki.

   Edith Elvira Ponson-Fawcett, conoci como ‘Nena’, a nace dia 1 November 1936 na Barranquilla (Colombia), pues a fayece cu 87 aña di edad.

   Na famia, amigo, y demas amistad di e baluarte Nena Ponson aki, DIARIO hunto cu famia Mansur ta extende su mas profundo palabra di condolencia.