Noord ta tristo cu fayecimento di señora Greta di Giselle Department Store

Un comerciante cu curazon yen di corahe

ORANJESTAD (AAN): Den fin di siman a drenta e tristo noticia, cu e dama cu tur hende conoce como “Greta” di Giselle Department Store a fayece.  El a bay descansa despues di a logra proyectonan grandi pa su pueblo di Noord, y tambe di un bataya feroz contra malesa.

   Lucrecia Catharina Figaroa a nace na Aruba dia 25 di November 1950, y tur hende tabata conoce como ‘Greta’.  El a cuminza traha na e compania Licores Aruba NV cu tabata situa na Belgiestraat na Playa.  Despues di esey, na 1981 a dicidi na habri un tienda riba e caminda di Noord pa Westpunt, cu yama “Giselle Department Store”.  E lugar a bira un hit instantaneo, como cu principalmente e consumidor femenino a bin nota cu den nan mesun distrito por haya tur loke nan tin mester for di paña interior te na paña di gala, y make-up, sin cu tin mester bay Playa.

   E tienda dado momento a cuminsa crece, y a haya su imagen di un berdadero pacus.  Asina a sigui expande y a bolbe bira mas grandi.

   Giselle Department Store no ta djis cualkier tienda, mas bien e ta un ‘institucion’.  Na final di 2023 nan a celebra 42 aña glorioso di existencia, y semper nan portanan a keda habri, danki na e espirito indomable di e team di Greta y muhernan balente cu tin su tras.  Apesar di restonan economico, e pandemia di Covid-19, y tempo cu a cambia, Greta y su team no a djis sobrevivi, pero a bay dilanti, sirbiendo comunidad di Noord y di Aruba cu dedicacion y amor.  E grandura di nan negoshi a keda crece pa asina por sirbi mas hende.  E ta un negoshi unda cu hasta prome cu e horario di habri, ya caba tin clientenan sinta den auto pafo ta warda e lugar kita lock pa clientenan drenta.

   Pueblo tabata encanta cu bo ta haya producto di calidad cumpra na Giselle, y esey ta algo cu semper Greta a keda boga pe.  Su bida tabata un inspiracion pa tur esnan cu a conoc’e.  Su filosofia di negoshi tabata diferente, incluyendo ora bo cumpra un co’i hunga na su lugar, e ta recorda empleadonan pa nan mes habri e juguete y instala bateria den nan.  Clientenan ta bay cu juguete ya cu bateria fresco instala den nan.

   Pa pueblo mes, Giselle no ta djis un lugar pa bay haci compras.  E ta un simbolo di resiliencia y compromiso di e muhernan.  Pero tabata trece e mihor paña, zapato, y mas pa e ser masculino, y tambe muchanan.  Fuera di esey su seleccion di co’i hunga ta extenso, incluyendo articulonan necesario pa cas.

   Greta despues a contrae matrimonio cu comerciante Oiky Posner, y por a mira nan hopi activo den eventonan social.  Consehonan di Posner a yuda Greta haci Giselle Department Store bira mas solido aun.

   Aunke ultimo temponan casi no tabata mira Greta Posner-Figaroa su presencia hopi (debi na su lucha intenso contra su malesa), toch e staf y personal tabata haya detaye constante di dje, y tabata encanta ora diripiente e ta pasa bishita nan, y bay atende asunto regular di e negoshi.  E ta mustra cu e ta un dama yen di corahe y deterninacion, y cada bataya cu e malesa mas bien tabata haci’e mas fuerte.

   Na aña 2018, Giselle Department Store a agrega dos director mas na cabez.  Pues ademas di Greta, awor a bin tambe Evelina Figaroa y Gisela Jaramillo.

   Comunidad semper tabata aprecia ora nan drenta Giselle Department Store, cu nan por mira presencia di e directornan Greta, of Evelina, of Gisela.

   Greta a fayece cu 73 aña di edad.  Na henter famia, su empleadonan, y amistadnan, DIARIO y famia Mansur ta extende su mas profundo palabra di condolencia.