AZV y Stichting WGK a firma contrato di continuacion di POH’s

*Awo ta inclui specializacion GGZ

ORANJESTAD (AAN) –Diahuebs ultimo a tuma lugar un conferencia di prensa yama pa AZV den cual a hiba palabra e Relacionista Publico Solange Tchong, Minister di Salud Dangui Oduber, Director di AZV Edwin Jacobs, Dokter van Trigt, presidente Asociacion Dokternan di Cas, Gino Goeloe,  director di Wit Gele Kruis, y Gina Maduro, lider di e Sindicato di Sector di Cuido di Hospital.

            Solange Tchong a duna di conoce cu nan a bin hunto e dia aki, pa firma e continuacion di e contrato entre Minister di Salud, e Organo Ehecutivo AZV y Stichting WGK.

E tema di e contrato aki ta e ampliacion y continuacion di e Praktijk Ondersteunernan miho conoci como POH’s.

            Tchong a splica cu adicionalmente  AZV y WGK ta na caminda pa introduci tambe e POH’s specializa riba tereno di salud mental “GGZ” (Geestelijke Gezondheid Zorg).

            “Tabata na 2012 cu pa prome biaha, Aruba a ser conoci cu Praktijk Ondersteuner, y awe exactamente 12 aña despues nos ta orguyoso di e trabaonan cu a tuma lugar. Organo Ehecutivo AZV  ta sigui inverti den su hendenan”, Solange Tjong a señala y seguidamente a mustra e presentenan un video unda por a mira e trabao di e Praktijk Ondersteunernan y nan rol importante den e relacion cu nan docter di cas, trahando den ekipo cu nan. Na final di e intervencion di cada funcionario cu a hiba palabra, e continuacion di e contrato a keda firma.