Colegio Hilario Angela den preparacion pa su Hofi Amistad

Hopi ta e scolnan cu ta interesa pa por tin un hofi pa asina nan por cultiva. Esaki tambe lo forma parti di nan les durante aña escolar. E ta un proyecto cu a

cuminsa na 2019 y awe keto bay tin scolnan interesa den e proyecto aki.

       Durante comienzo di siman pasa, e docentenan di Colegio Hilario Angela a haci un bishita na  departamento di Agricultura, Cria y Pesca, Santa Rosa, pa asina haya un presentacion di kico lo ta e tareanan basico di plantamento. Esaki a wordo duna door di nos colega sr. Ludwig Rasmijn pa asina e docentenan por pasa e conocemento aki pa nan alumnonan di Colegio Hilario Angela pa crea nan Hofi Amistad. Tabata un dia completo di enrikecimento, mas nan conocemento di tur locual ta encera plantamento pa e docentenan cu, sigur di nan parti, a haya esaki hopi interesante.

       Ta den fin di e siman cu ta tras di lomba di parti Santa Rosa a haci un bishita na Colegio Hilario Angela pa duna un presentacion di plantamento basico na e alumnonan. Aki sr. Ludwig Rasmijn y sr. Randy Maduro a percura pa e presentacion pa tur e klasnan di e scol. E muchanan a disfruta di esaki y tur alumnonan a ricibi nan pochi, gordura y semia y a practica nan plantamento. Awor nan ta bon prepara y tin conocemento con pa atende cu nan semia y mata pa nan bay planta y crea nan Hofi Amistad.

       Riba e mainta aki minister encarga cu Sector Primario sr. Chris Romero tambe a haci un bishita na Colegio Hilario Angela, cu su persona mes a bishita den su hubentud cu ta e scol cu e mes a bishita den su hubentud, pa mira e desaroyo di e Hofi Amistad. E cabesante di Colegio Hilario Angela,  sra. Cornelia Aventurin-Connor hunto cu docente sra. Shaneila Geerman, cu ta encarga cu e proyecto, a ricibi minister Chris Romero pa asina por a mira e desaroyo y kico tur a wordo haci y ta bay wordo haci pa asina realiza e Hofi Amistad aki.  Despues minister Chris Romero a pasa den e klas, cu tabata hayando e presentacion na e momento ey, pa dirigi algun palabra di encurashamento na e alumnonan y felicita nan cu nan hofi cu pronto lo wordo finaliza.

       Den nomber di minister Chris Romero, conhuntamente cu Santa Rosa, ta desea Colegio Hilario Angela hopi exito cu nan Hofi Amistad y pronto nos por mira nos muchanan por cosecha e fruto di nan Hofi.

       Pabien na Colegio Hilario Angela completo y su alumnonan cu e bunita proyecto aki.