Colegio EPI ta bay duna un man grandi pa profesionaliza e cuido di nos grandinan

Acuerdo nobo firma

ORANJESTAD (AAN): Diabierna mainta den Collegezaal na Colegio EPI, a tuma un acto importante di firmamento di acuerdo, na unda tabatey presente Ministro Mervin Wyatt Ras, Ministro Gerlien Croes, Desiree Helder di Directie Ouderenzaken, y Ankie Danker kende ta directora di Colegio EPI.

   Asina e firma un acuerdo entre Gobierno di Aruba, Colegio EPI y Directie Ouderenzaken pa cu educacion y profesionalizacion den e area di cuido den cuadro di ‘Long Life Learning - LLL’.

   Gobierno di Aruba ta compromete pa sigui inverti den su hendenan y sigui crea mas oportunidad pa tur, y ta enfoca riba “Building Skills, Honoring Our Elders.”

   Por mira cu e atencion riba cuido di nos grandinan lo bay haya un empuhe enorme pa mehora tur aspecto di esaki.  Pabien na tur esnan envolvi den e pasonan importante aki cu a ser tuma.