Señora Kimberly De Groot
ORANJESTAD (AAN): Dia Mundial di Diabetes, bou iniciativa di Nacionnan Uni, ta wordo observa anualmente riba 14 di November pa reflexiona riba un crisis di salud cu ta sigui crece mundialmente. Riba e dia aki especialmente, ta pidi pa intensifica prevencion, fortifica educacion y sostene esnan cu ta pasando den e lucha. Señora Kimberly De Groot, Presidente di Fundacion Diabetes Aruba en conexion cu e dia aki, a duna un splicacion na DIARIO di e situacion na Aruba pa e enfermedad aki.
Fundacion Diabetes Aruba e aña aki a enfoca riba diabetes na pia di trabou. Diabierna mainta, nan a bishita Hilton na unda a concientiza y duna presentacion na e empleadonan di no solamente prevencion pa nan mes, sino tambe e cuido y con pa yuda esnan cu tin e malesa y sostene nan manera e simbolo di diabetes ta sugeri.
Señora De Groot a remarca cu e controlnan di prevencion ta revela cu muchanan hopi hoben, 25 aña, e suco ta hopi halto. Segun investigacionnan, bebidanan cu ta contene suco ta un di e motibonan di esaki y ta trece hopi complicacion pa esnan cu ya tin e malesa.
El a expresa cu e costumber di bida aki ta cuminsa na cas na unda cu muchanan ta wordo permiti desde hopi chikito pa bebe e bebidanan aki, y no ta bebe suficiente awa. E tendencia aki tambe ta pasa den loke nan ta come, entre otro pastechi, enbes di come fruta y berdura. Esaki ta un manera no saludabel pa muchanan crece cu ne y e forma di bida aki lo bira un costumber mientras nan ta creciendo. Solucion ta pa cuminsa y keda educa y concientiza nos muchanan for di cas caba.
