ORANJESTAD (AAN): Prome Minister mr. Mike Eman durante Accion di Bario na Playa Pabao a duna un declaracion riba e mal estado di diferente caminda den e area di Centro di Bario Playa Pabao.
A indica cu lo bay mehora e acceso pa yega e centro di Bario. A cuminsa awe cu accion pa mehora e nivel di e tereno, cu ta yen di buraco, yenando esakinan cu granit. Ta spera di mira luga den presupuesto otro aña, pa asina pronto por basha asfalt y asina yuda e situacion dilanti Centro di Bario Playa Pabao.
Premier Eman a menciona tambe cu ta diferente area ta en espera di asfalt, segun por a compronde for di Minister Herde, pa otro aña lo tin presupuesto disponibel pa asfalt y asina mehora careteranan y areanan cu ta pendiente pa esaki.
Ta premira cu pa otro aña lo tin hopi bario cu lo bay mira cambio grandi y cu lo haya asfalt pa mehoracion di e bario. Algun cu pa hopi aña a biba den stof pero cu porfin lo ricibi e asfalt cu nan a pidi como tambe iluminacion.
Trabao a cuminsa na varios area rond nos isla na unda cu a cuminsa nivela diferente caminda pa asina prepara pa e siguiente fase cu lo bira muy pronto e bashamento di asfalt. Un cambio/mehoracion den infrastructura, cu ta nifica un mehoracion den calidad di bida den e barionan tambe.
Tin un lista largo cual tin atencion di gobierno, den gobernacion anterior di Mike Eman a inverti masha hopi den infrastructura, entre otro den Green Corridor y Watty Vos Boulevard, den hopi bario caminda a embeyece cu klinkers y acera full rond nos isla.
"Apesar di tur e critica cu a ricibi cu no por come klinker, ta sali for di un gobierno cu no a inverti den absolutamente nada, ni klinker, ni asfalt ni nada pa e pais". E peticion di e pueblo pa duna atencion na infrastructura a ser scucha y pronto lo mira iluminacion, verkeersplateau y asfalt cu ta prioridad halto pa 2026.
