Colegio Cristo Rey ta organiza Diabierna awor un ‘Festival di Pasco’ cu cuminda

ORANJESTAD (AAN): Diabierna awor lo bay tin un evento festivo na Colegio Cristo Rey na Brazil, cu ta forma parti di un serie di actividad cu e scol a organiza pa recauda fondo.

   Na Aruba, enseñanza ta wordo digitaliza y riba e ruta ey tambe Colegio Cristo Rey ta tuma e pasonan pa por brinda e alumnonan e mihor den enseñanza via e habilidad di educacion di siglo 21.

   Cabezante di Colegio Cristo Rey, esta Jani Stamper a indica cu cada evento cu nan ta organizando tin un meta su tras.  E prome actividad tabata un ‘Anochi di Pelicula’, tambe a organiza un Rifa, y awor nan tin evento cu yama ‘Festival di Pasco’.

   Esaki lo ta Diabierna 4 di November 2022 for di 6:30 pm te cu 11:00 pm.  Cu e Festival di Pasco aki nan ta bay trata na recauda fondo pa por haya ingreso pa por cumpra mas borchi digital pa pone den e klasnan na e scol.  Stamper a mustra cu e alumnonan di e generacion nobo aki, ta gusta mira cosnan mas visual y pesey scol tambe tin di adapta nan manera di duna les den e epoca moderno.  Pues no ta algo djis exclusivamente for di buki.

   Colegio Cristo Rey ta traha duro pa trece tambe e ambiente festivo di Pasco cerca e bishitantenan den e bario, pa asina reuni tur hende.  Nan ta spera cu mas ciudadano di e isla haci un bishita y sinti e zjeito y alegria di temporada di Pasco.

   E scol basico aki na Brazil a pasa algun tempo pasa den renobacion, y tur cos a wordo haci mas ‘amistoso’ pa e muchanan, y tambe pa e mayornan.  Segun Stamper, e cambionan no djis den bista externo, pero tambe interno cu e.o. e adaptacion di curiculo.

   E scol a ricibi varios mural bunita pa asina e muchanan por haya mensahe educativo y cu ta duna nan animo pa sigui siña, y cu mensahenan anti-droga tambe.

   Docente Mari Servud a indica cu e Festival di Pasco lo bay tin diferente tent ofreciendo cuminda, incluyendo Ham di Pasco, tambe cushina cu Ayaca, Sanger Yena, y variedad di cuminda.

   E anochi lo tin dos gaita, esta Aguinaldo Flor di Pasco y Gaita di Mama Rosa.  Tentnan lo ta decora y kizas lo tin Santa Claus canando rond tambe y lo bira un anochi dushi pa pasa cu famia.

   Como cu parkinglot ta limita, lo bay tin guia pa trafico unda pa staciona y lo tin security ta cuidando vehiculonan.  Mihor area ta pa para banda di Misa di Brazil, y yega trempan pa disfruta di e anochi.