ORANJESTAD (AAN): Recientemente a tuma lugar un press conference unda cu Thousand Smiles Foundation a introduci nan mes oficialmente.
Thousand Smiles Foundation ta un fundacion cu tin varios aña trahando pa comunidad den diferente proyecto di mucha, pareha, famia y comunidad en general haciendo bon causanan.
E aña aki comision a sinta y a dicidi di nombra y lansa e fundacion oficialmente.
E prome evento oficial lo ta diadomingo 20 di november proximo y esaki lo ta dedica specialmente na nos muchanan mirando cu dia 20 di november ta dia internacional di derechonan di mucha.
Thousand Smiles Foundation lo bay haci 1000 mucha contento riba e dia aki. Lo reparti mil invitacion na muchanan di diferente instancia, fundacion, scol, organisacionan y lo pone algun invitacion disponibel pa radio emisoranan pa rifa pa e muchanan di Aruba en general.
Cu e invitacion aki e muchanan lo por drenta gratis y lo por participa y ricibi un popcorn, cotton candy, face painting, Dino jump, blas cu forma, un soft y un cos pa come y tambe lo tin weganan di movicion, shownan di baile di mucha y pa completa e bunita atardi cada mucha inscribi lo ricibi un tas cu algun regalito aden.
Pa por caba di realisa e proyecto aki, bo sosten lo haci un diferencia, tin e oportunidad pa adopta un mucha of mas dunando un contribucion di 25 florin cu ta cubri un mucha.
Por registra un mucha entre 4 pa 12 aña.
A haci un yamada ta na tur compania cu lo kier uni nan mes na e causa aki tin tempo ainda pa join y tambe adopta mucha of contribui cu regalitonan of producto cu lo por bay den e tas pa e muchanan.
Thousand Smiles foundation kier a haci uzo di e oportunidad na nan sponsorcu a habri su portanan pa host e evento y tur compania y persona cu te cu awo a aporta y adopta un mucha y cu a duna nos sosten cu proyecto. Thousand Smiles Foundation ta kere den e poder di duna y e forsa cu union por tin.
